‘नयाँ देश निर्माणको सुरुवात’ भन्दै ट्रम्पको चेतावनी– इरान आक्रमण सकिने, तर कडा प्रहार गर्न बाँकी

वासिङ्टन । अमेरिकी राष्ट्रपति डोनाल्ड ट्रम्पले इजरायलसँग मिलेर इरानमाथि गरिएको सैन्य हमला ‘चाँडै’ सकिने बताएका छन्। फ्लोरिडामा आयोजित पत्रकार सम्मेलनमा सोमबार पत्रकारहरूसँग कुरा गर्दै ट्रम्पले हमला यो साताभित्रै सकिन्छ कि भन्ने प्रश्नमा ‘होइन, तर चाँडै, धेरै चाँडै’ सकिने जवाफ दिए।

यद्यपि, उनले एकैसाथ दुई प्रकारका सन्देश दिएका छन्— एकातिर अमेरिकी लक्ष्यहरू ठूलो मात्रामा पूरा भइसकेको दाबी, अर्कोतिर रक्षामन्त्री पिट हेगसेथले दिएको ‘लडाइँ भर्खर सुरु भएको’ चेतावनीप्रति समर्थन। ‘खैर, मलाई लाग्छ तपाईं दुवै भन्न सक्नुहुन्छ,’ ट्रम्पले भने, ‘यो एउटा नयाँ देश निर्माणको सुरुवात हो।’

राष्ट्रपति ट्रम्पले इरानसँग अब ‘न नौसेना छ, न वायुसेना, न एन्टी–एयरक्राफ्ट उपकरण, सबै ध्वस्त पारिएको’ दाबी गरे। उनका अनुसार फेब्रुअरी २८ मा अमेरिका र इजरायलले इरानमाथि ठूलो आक्रमण सुरु गरेयता अमेरिकी सेनाले ५ हजारभन्दा बढी लक्ष्यमा हमला गरिसकेको छ। ‘तीमध्ये केही धेरै ठूला लक्ष्य थिए,’ ट्रम्पले भने, ‘अमेरिकी सेनाले केही सबैभन्दा महत्त्वपूर्ण लक्ष्यहरू पछिको लागि छाडेको छ, यदि हामीले गर्न आवश्यक भयो भने।’

उनले थपे, ‘यदि हामीले ती प्रहार गर्यौं भने, तिनलाई पुनर्निर्माण गर्न धेरै वर्ष लाग्नेछ, जसमा बिजुली उत्पादन र अन्य धेरै कुराहरू समावेश छन्।’

ट्रम्पले इरानका नयाँ सर्वोच्च नेता मोज्तबा खामेनाईप्रति ‘निराशा’ व्यक्त गरे तर उनीमाथि घातक आक्रमण गर्ने सम्भावनाबारे भने जवाफ दिन अस्वीकार गरे। ‘हामी निराश छौं किनकि हामीलाई लाग्छ यसले देशको लागि थप समस्याहरू निम्त्याउनेछ,’ उनले भने।

ट्रम्पले व्हाइट हाउसले मूल्य घटाउन ‘तेलसम्बन्धी केही प्रतिबन्धहरू हटाउने’ पनि बताए, तर कुन प्रतिबन्ध हट्ने भन्ने खुलाएनन्। ‘हामीसँग केही देशहरूमाथि प्रतिबन्ध छ। यो अवस्था नसुल्झिउन्जेल हामी ती प्रतिबन्धहरू हटाउने छौं,’ उनले भने। उनले यदि इरानले ‘विश्वको तेल आपूर्ति रोक्ने प्रयास गरे’ भने ‘धेरै धेरै कडा स्तरमा प्रहार गरिने’ चेतावनी दिए।

फेब्रुअरी २८ मा इजरायल र अमेरिकाले तेहरान र अन्य धेरै इरानी सहरहरूमा संयुक्त आक्रमण गरेका थिए, जसमा इरानका सर्वोच्च नेता अली खामेनाई, वरिष्ठ सैन्य कमाण्डर र नागरिकहरू मारिएका थिए। इरानले जवाफमा मध्यपूर्वमा रहेका इजरायली र अमेरिकी अड्डाहरू लक्षित गर्दै मिसाइल र ड्रोन आक्रमणहरू गरेको थियो।

इरानका विदेशमन्त्री सैयद अब्बास अरागचीले सोमबार सामाजिक सञ्जाल एक्समा भनेका छन्, देशसँग अमेरिकाको लागि ‘धेरै आश्चर्यहरू सुरक्षित’ छन् र कुनै पनि अमेरिकी ‘षड्यन्त्र’ को सामना गर्न इरान तयार रहेको पनि उनले उल्लेख गरेका छन्।