गृहमन्त्री अर्याल र चिनियाँ राजदूतबीच कूटनीतिक भेट: साइबर अपराध नियन्त्रणमा चिनियाँ सहयोगको अपेक्षा
काठमाडौं — नेपालका लागि चिनियाँ राजदूत चाङ माओमिङले गृहमन्त्री ओमप्रकाश अर्यालसँग उहाँको कार्यकक्षमा शिष्टाचार भेट गरेका छन्। सोमबार भएको उक्त भेटमा नेपाल–चीन द्विपक्षीय सम्बन्ध र आपसी सहयोगका विविध आयामहरूमा विचार–विमर्श भएको गृहमन्त्रालयले जनाएको छ।
भेटका अवसरमा गृहमन्त्री अर्यालले चीनले नेपालको आर्थिक–सामाजिक विकासमा पुर्याएको योगदानप्रति हार्दिक कृतज्ञता व्यक्त गर्दै भविष्यमा पनि त्यसले निरन्तरता पाउने विश्वास व्यक्त गरे। उनले नेपाल र चीनबीचको सम्बन्ध नयाँ उचाइमा पुग्ने कामना गर्दै राजदूत चाङको कार्यकाल सफल रहने धारणा राखे।
गृहमन्त्री अर्यालले दूरसञ्चार क्षेत्रको विकास र साइबर अपराध (साइबर क्राइम) नियन्त्रणका लागि चिनियाँ सहयोग र सहकार्यको आवश्यकता रहेको बताए। उनले यी क्षेत्रमा अनुभव आदानप्रदान र प्राविधिक सहयोगले दुवै देशलाई फाइदा पुग्ने धारणा राखे।
चिनियाँ राजदूत चाङ माओमिङले नेपालमा सफलतापूर्वक आम निर्वाचन सम्पन्न भएकामा नेपाल सरकारलाई बधाई तथा धन्यवाद दिए। उनले दुई देशबीचको मैत्रीपूर्ण सम्बन्धलाई अझ सुदृढ बनाउन र सहकार्यका क्षेत्रहरू विस्तार गर्न हरसम्भव प्रयास गर्ने प्रतिबद्धता व्यक्त गरे। राजदूतले नेपालको विकास आवश्यकताअनुरुप चीनले निरन्तर साथ दिने पनि बताए।
