एमाले महासचिव पोखरेलको स्पष्टोक्ति : ‘मैले नै दाङ बोलाएको थिएँ’
काठमाडौं : नेकपा एमालेका महासचिव शंकर पोखरेलले पार्टीका युवा नेता योगेश भट्टरईसँगको आफ्नो सम्बन्ध र निर्वाचनका बेलाको जिम्मेवारीबारे सामाजिक सञ्जालमा भइरहेको चर्को बहसपछि स्पष्टीकरण दिएका छन्। उनले योगेशलाई वक्ताका रूपमा माग भएका स्थानहरूमा जान आफूले नै अनुरोध गरेको खुलासा गर्दै अहिले चलिरहेको भ्रम चिर्न चाहेको बताएका छन्।
महासचिव पोखरेलले आफ्नो आधिकारिक फेसबुक पेजमार्फत लेखेका छन्, “अहिले सामाजिक सञ्जालमा योगेशजीले निर्वाचनका समयमा महासचिवसँग जिम्मेवारी माग्दा नपाएको भन्ने चर्चा भएको रहेछ। तर मैले उहाँलाई वक्ताका रूपमा माग भएका स्थानहरूमा मिलेसम्म गइदिन अनुरोध गरेको कुरा भने कतै उल्लेख भएको देखिनँ।”
उनले अझ थप्दै भनेका छन्, “अझ मैले समय मिलेमा दाङमा समेत आउन अनुरोध गरेको थिएँ। त्यसबेला उहाँले ताप्लेजुङ जानुपर्ने बताउनुभएको थियो। मैले त्यसलाई स्वाभाविक रूपमा लिएको थिएँ।”
एमाले महासचिवले वर्तमान अवस्थामा योगेशका नाममा सम्प्रेषित समाचारप्रति आश्चर्य प्रकट गर्दै त्यसलाई भ्रमपूर्ण बताएका छन्। उनले योगेशको भनाइको अधुरो अंश मात्र सम्प्रेषण भएको हुन सक्ने आशंका गर्दै भ्रम नपरोस् भनेर मात्र आफूले यो स्पष्ट गरेको उल्लेख गरेका छन्।
पार्टीको आन्तरिक जिम्मेवारी बाँडफाँड र नेताहरूबीचको संवादलाई लिएर केही दिनदेखि सामाजिक सञ्जालमा बहस चलिरहेको थियो। योगेश भट्टरईसँग जोडेर आएका केही टिप्पणीप्रति पोखरेलको यो स्पष्टोक्तिले एमाले कार्यकर्ता र समर्थकबीच चासोको विषय बनेको छ।
