मध्यपूर्वको असर लाओससम्म : इन्धन सङ्कट समाधान गर्न उच्चस्तरीय बैठक बोलाए प्रधानमन्त्रीले
काठमाडौं : मध्यपूर्वको बढ्दो तनावको छायाँ अहिले दक्षिणपूर्वी एसियासम्म पुगेको छ। इन्धनको मूल्यवृद्धि र आयातमा आएको गिरावटले लाओसलाई समस्यामा पारेपछि त्यहाँका प्रधानमन्त्री सोनेक्साइ सिफान्डोनले शुक्रबार उच्चस्तरीय परामर्श बैठक बोलाएका छन्।
लाओ राजधानी भियनतियानेमा सम्पन्न उक्त बैठकमा उपप्रधानमन्त्री, मन्त्रीपरिषद्का सदस्य तथा सरकारी र निजी क्षेत्रका प्रतिनिधिहरूको सहभागिता रहेको शनिबार सार्वजनिक समाचारमा जनाइएको छ।
बैठकले मध्यपूर्वको अस्थिरताका कारण विश्व बजारमा इन्धनको मूल्यमा भएको उछाल र आयातमा देखिएको गिरावटको प्रभावलाई सम्बोधन गर्न केन्द्रित रहेको थियो। सहभागीहरूले आपूर्ति स्रोतमा विविधीकरण गर्ने र भरपर्दो तथा छिटो आयातको सुनिश्चितताका लागि संयन्त्र बनाउने विषयमा छलफल गरेका थिए।
बैठकमा इन्धन भण्डारणको नियमनलाई सुदृढ पार्ने र मुलुकभर प्रभावकारी वितरण सुनिश्चित गर्ने विषयलाई प्राथमिकतामा राखिएको थियो। दीर्घकालीन समाधानका लागि सरकारले वैकल्पिक ऊर्जा नीतिलाई जोड दिने भएको छ। यसअन्तर्गत विद्युतीय सवारीसाधन (ईभी) को प्रयोग प्रवर्द्धन गर्ने र शहरी तथा आवासीय क्षेत्रमा सार्वजनिक ईभी यातायात सञ्जाल विस्तार गर्ने योजना रहेको छ।
बैठकको अध्यक्षता गर्दै प्रधानमन्त्री सिफान्डोनले राष्ट्रिय एकतालाई बलियो बनाउन, बढ्दो इन्धन मूल्यको सामाजिक प्रभाव न्यूनीकरण गर्न र विकास परियोजनालाई निरन्तरता दिन सार्वजनिक सचेतना अभियानको आवश्यकतामा जोड दिए।
प्रस्तावित उपायहरूको प्रभावकारी कार्यान्वयनका लागि सरकारले एउटा विशेष कार्यदल गठन गर्ने र अल्पकालीन तथा दीर्घकालीन उपायहरूलाई कानुनी रूप दिने निर्णय गरेको छ। यसले मन्त्रालय र स्थानीय निकायलाई तत्काल कारबाहीका लागि स्पष्ट अधिकार प्रदान गर्नेछ।
