होर्मुज जलसन्धि पूर्ण रूपमा बन्द, अमेरिकी नाकाबन्दी नहटेसम्म नखोलिने इरानी क्रान्तिकारी गार्डको घोषणा
तेहरान — इरानको इस्लामिक क्रान्तिकारी गार्ड कोर (आईआरजीसी) को नौसेनाले होर्मुज जलसन्धि शनिबार साँझदेखि पूर्ण रूपमा बन्द गरिएको र अमेरिकाले आफ्नो नौसैनिक नाकाबन्दी नहटाएसम्म यसलाई नखोलिने घोषणा गरेको छ।
आईआरजीसीको आधिकारिक समाचार माध्यम सेपाह न्युजमा जारी विज्ञप्तिमा भनिएको छ, “गत अप्रिल ८ देखि लागू भएको दुई साताको युद्धविरामअन्तर्गत अमेरिकाले आफ्नो प्रतिबद्धता उल्लङ्घन गरेको र इरानी जहाज तथा बन्दरगाहमाथिको नौसैनिक नाकाबन्दी अन्त्य गर्न असफल भएपछि यो कदम चालिएको हो।”
आईआरजीसी नौसेनाले सबै जहाज र तिनका मालिकहरूलाई आफ्नो च्यानल तथा अन्तर्राष्ट्रिय समुद्री आपत्कालीन फ्रिक्वेन्सी भीएचएफ च्यानल १६ मार्फत आधिकारिक सूचनाहरू पालना गर्न आह्वान गरेको छ। विज्ञप्तिमा थप भनिएको छ, “होर्मुज जलसन्धि र खाडी क्षेत्रमा अमेरिकी राष्ट्रपति डोनाल्ड ट्रम्पका भनाइहरूको कुनै विश्वसनीयता छैन।”
आईआरजीसीले खाडी वा ओमानको खाडीमा लङ्गर गरेर बसेका कुनै पनि जहाजले आफ्नो स्थानबाट नहिँड्न चेतावनी दिँदै जलसन्धि नजिक पुग्ने जोसुकैलाई “शत्रुसँगको सहकार्य” मानिने र सोहीअनुसार निसाना बनाइने स्पष्ट पारेको छ।
गत फेब्रुअरी २८ मा इजरायल र अमेरिकाले इरानी भूभागमा संयुक्त आक्रमण गरेपछि इरानले ती दुई देशसँग सम्बन्धित जहाजलाई जलसन्धि पार गर्न प्रतिबन्ध लगाउँदै यस क्षेत्रमा नियन्त्रण कडा पारेको थियो। पाकिस्तानको इस्लामाबादमा भएको शान्ति वार्ता भङ्ग भएपछि अमेरिकाले पनि जलसन्धिमा आफ्नै नाकाबन्दी लगाएको थियो।
यसैबीच, शुक्रबार इरानी विदेशमन्त्री सेयद अब्बास अराघचीले अमेरिकासँगको हालको युद्धविराम अवधिभर लेबनान युद्धविरामको घोषणाअनुरूप व्यापारिक जहाजका लागि जलसन्धि “पूर्ण रूपमा खुला” रहने बताएका थिए। तर अमेरिकी राष्ट्रपति ट्रम्पले शुक्रबार नै अमेरिकी नौसैनिक नाकाबन्दी “पूर्ण रूपमा कायम” रहने र इरानले अमेरिकासँग सम्झौता नगरेसम्म यसलाई नहटाइने बताएका थिए। शनिबार उनले थप प्रतिक्रिया दिँदै इरानले जलसन्धिको मुद्दालाई लिएर अमेरिकालाई “ब्ल्याकमेल” गर्न नसक्ने दाबी गरेका छन्।
