युरोपमाथि फ्रान्सको ‘आणविक छाता’ पहललाई रुसले सम्भावित लक्ष्य सूचीमा समावेश गर्ने चेतावनी
मस्को — फ्रान्सले युरोपमाथि तथाकथित ‘आणविक छाता’ (न्युक्लियर अम्ब्रेला) निर्माण गर्न अघि सारेको पहललाई रुसले कुनै पनि काल्पनिक द्वन्द्वको अवस्थामा प्राथमिकताका लक्ष्यहरू पहिचान गर्दा ध्यानमा राख्ने भएको छ। रुसी उपविदेशमन्त्री अलेक्जान्डर ग्रुस्कोले आइतबार यस्तो चेतावनी दिएका हुन्।
रुसी समाचार संस्था ‘आरआईए नोभोस्ती’ लाई दिएको अन्तर्वार्तामा उपविदेशमन्त्री ग्रुस्कोले विशेषगरी आणविक अस्त्ररहित युरोपेली राष्ट्रहरूमा फ्रान्सेली आणविक बलको सम्भावित तैनाथीप्रति रुसको ध्यान केन्द्रित भएको बताए। उनले भने, “यो स्पष्ट छ कि कुनै गम्भीर द्वन्द्वको अवस्थामा प्राथमिकताका लक्ष्यहरूको सूची अद्यावधिक गर्दा हाम्रो सेनाले यस विषयमा गम्भीर ध्यान दिन बाध्य हुनेछ।”
यसअघि गत मार्चको सुरुमा फ्रान्सेली राष्ट्रपति इमानुएल म्याक्रोँले फ्रान्सको आणविक ब्यालेस्टिक क्षेप्यास्त्र पनडुब्बीहरूको केन्द्र रहेको ‘इल लङ्ग’ नौसैनिक अड्डाबाट सम्बोधन गर्दै फ्रान्सले आफ्नो आणविक हतियारको सङ्ख्या वृद्धि गर्ने र युरोपेली साझेदारहरूसँग प्रतिरोधात्मक क्षमतामा सहकार्य विस्तार गर्ने योजना सार्वजनिक गरेका थिए।
रुसी उपविदेशमन्त्रीको यो अभिव्यक्तिले युक्रेन द्वन्द्वका कारण रुस र पश्चिमा शक्तिहरूबीच चर्किएको तनावबीच युरोपेली सुरक्षा संरचनामा आउन सक्ने सम्भावित परिवर्तनप्रति मस्कोको गम्भीर चासो र रणनीतिक सतर्कतालाई प्रस्ट पारेको छ। फ्रान्सले अघि सारेको यो प्रस्तावले युरोपेली सङ्घभित्र साझा सुरक्षा र प्रतिरक्षा नीतिको बहसलाई थप गति दिने अनुमान गरिएको छ।
