इरानी आगोले भुइँमा ल्यायो ‘अजेय’ एफ-३५ : पहिलो पटक अमेरिकी युद्धक विमानमा सीधा प्रहार
काठमाडौं – इरानविरुद्धको युद्धमा अमेरिकी ‘अजेय’ लडाकु विमान एफ–३५ माथि पहिलो पटक सीधा आक्रमण भएको छ। सीएनएनले घटनाबारे जानकार दुई स्रोतलाई उद्धृत गर्दै जनाएअनुसार इरानी आक्रमणको आशंकामा एफ–३५ विमान बिहीबार मध्यपूर्वस्थित अमेरिकी सैन्य अखडामा आपत्कालीन अवतरण गर्न बाध्य भएको हो।
फेब्रुअरी २८ मा अमेरिका र इजरायलले इरानमाथि आक्रमन सुरु गरेयताकै यो पहिलो पटक हो कि इरानले अमेरिकी युद्धक विमानमा सीधा प्रहार गरेको छ। अमेरिकी मध्य कमान्डका प्रवक्ता टिम हकिन्सका अनुसार विमान “इरानको आकाशमा युद्ध अभियानमा उडिरहेको” अवस्थामा आपत्कालीन अवतरण गर्नु परेको हो। उनले विमान सुरक्षित अवतरण भएको र पाइलटको अवस्था स्थिर रहेको जानकारी दिँदै घटनाको अनुसन्धान भइरहेको बताए।
प्रति विमान १० करोड अमेरिकी डलरभन्दा बढी मूल्य पर्ने यी स्टेल्थ विमान अमेरिका र इजरायल दुवैले इरानविरुद्ध प्रयोग गरिरहेका छन्।
यो घटनाको ठीक अघि बिहीबारै पेन्टागनमा पत्रकार सम्मेलन गर्दै अमेरिकी रक्षासचिव पिट हेगसेथले इरानको हवाई रक्षा प्रणाली ‘ध्वस्त’ भइसकेको दाबी गरेका थिए। त्यस्तै अमेरिकी संयुक्त सेना प्रमुख डान केनले इरानसँग अझै अमेरिका र उसका सहयोगीको तेल प्रतिष्ठानलगायत लक्ष्यमा आक्रमण गर्ने ‘केही क्षमता’ रहेको बताएका थिए।
बुधबार इजरायलले इरानको दक्षिण पार्स ग्याँस क्षेत्रमा गरेको आक्रमणपछि अमेरिका–इजरायल र इरानबीच द्वन्द्व झन् चर्किएको छ। इरानी आक्रमणमा कतारको तरल प्राकृतिक ग्याँस सुविधामा आगलागी र व्यापक क्षति भएको छ, जसले गर्दा बिहीबार तेल र ग्याँसको मूल्य फेरि आकासिएको छ।
