भारतका प्रधानन्यायाधीश सूर्यकान्त गान्तोकमा हुने राष्ट्रिय न्यायिक सम्मेलनमा सहभागी हुने
गान्तोक (सिक्किम) — भारतका ५३ औं प्रधानन्यायाधीश न्यायाधीश सूर्यकान्त आगामी वैशाख १८ र १९ गते (मे १ र २) मा सिक्किमको गान्तोकमा आयोजना हुने ‘प्रविधि र न्यायिक शिक्षासम्बन्धी राष्ट्रिय सम्मेलन’ मा सहभागी हुने भएका छन्।
सिक्किम उच्च अदालतको संयोजनमा आयोजना हुन लागेको उक्त सम्मेलनमा भारतको सर्वोच्च अदालत, विभिन्न उच्च अदालतका न्यायाधीशहरू तथा विदेशी विशिष्ट व्यक्तित्वहरूको समेत सहभागिता रहने अपेक्षा गरिएको छ।
यसैबीच, उच्चस्तरीय सम्मेलनको तयारीका लागि तासिलिङ सचिवालयमा एक समन्वयात्मक बैठक सम्पन्न भएको छ। बैठकले सुरक्षा व्यवस्था, प्रोटोकल पालना, रसद व्यवस्थापन तथा सम्मेलन स्थलको तयारी लगायतका विषयहरूको समीक्षा गरेको थियो।
आयोजकहरूका अनुसार दुई दिनसम्म चल्ने यस सम्मेलनले देशभर न्यायिक शिक्षालाई सुदृढ गर्न र अदालती प्रणालीको आधुनिकीकरणमा प्रविधिको भूमिकाका बारेमा गहन छलफल गर्ने लक्ष्य राखेको छ।
