सिड्नीमा सङ्गठित अपराधबीचको द्वन्द्व : अपहरणमा संलग्न पाँच जना पक्राउ

सिड्नी, अस्ट्रेलिया — पश्चिमी सिड्नीमा सङ्गठित अपराधसँग जोडिएका एक व्यक्तिको मध्यरातमा भएको हिंसात्मक अपहरणको घटनामा संलग्न रहेको आरोपमा पाँच जना पक्राउ परेका छन्। प्रहरीले मङ्गलबार जानकारी दिएअनुसार सोमबार राति स्थानीय समयअनुसार करिब ११:३० बजे केन्द्रीय सिड्नीबाट २० किलोमिटर पश्चिममा रहेको गिल्फोर्डस्थित एक घरबाहिर एक व्यक्तिमाथि आक्रमण गरी उनलाई जबर्जस्ती गाडीमा हालिएको थियो। पीडित व्यक्ति ३० वर्षको उमेर समूहका रहेका छन्।

घटनाको केही समयपछि उक्त गाडी आंशिक रूपमा जलेको अवस्थामा फेला परेको थियो। प्रहरीले पीडितलाई राति १२:३० बजे दक्षिणपश्चिम सिड्नीस्थित एक घरमा फेला पारेको थियो। उनलाई स्थिर अवस्थामा उपचारका लागि अस्पताल पुर्याइएको छ। उक्त घरबाट भाग्न खोजेको आरोपमा पाँच जनालाई नजिकैबाट पक्राउ गरी प्रहरी कार्यालय लगिएको छ।

स्थानीय सञ्चार माध्यमहरूले मङ्गलबार जनाएअनुसार अपहरणमा परेका ती व्यक्तिको एक सङ्गठित अपराध सञ्जालसँग सम्बन्ध रहेको र यो अपहरण प्रतिद्वन्द्वी सञ्जालले गराएको हो। अस्ट्रेलियन ब्रोडकास्टिङ कर्पोरेसनका अनुसार सन् २०२५ को जुनमा पनि ती व्यक्तिमाथि हत्याको असफल प्रयास भएको थियो। सङ्गठित अपराधबीच बढ्दो द्वन्द्वसँग जोडिएका हिंसात्मक घटनाहरूको अनुसन्धान र नियन्त्रणका लागि सन् २०२५ को मेमा गठन गरिएको प्रहरी कार्यदलले यस अपहरण प्रकरणको अनुसन्धानको नेतृत्व गरिरहेको छ।