‘अखिल रुसी एआई ओलम्पियाड २०२६’ को सुरुवात, एकै शैक्षिक सत्रमा ५२ हजार विद्यार्थीको सहभागिता

मस्को – रुसी उपप्रधानमन्त्री दिमित्री चेर्निसेन्को र शिक्षामन्त्री सेर्गेई क्राभ्त्सोभले संयुक्त रूपमा ‘अखिल रुसी कृत्रिम बौद्धिकता (एआई) ओलम्पियाड २०२६’ को औपचारिक सुरुवात गरेका छन्।

उपप्रधानमन्त्री चेर्निसेन्कोले उक्त प्रतियोगिता राष्ट्रपति भ्लादिमिर पुटिनको निर्देशनमा कार्यान्वयन भइरहेको राष्ट्रिय परियोजना ‘तथ्याङ्क अर्थतन्त्र र राज्यको डिजिटल रूपान्तरण’ अन्तर्गत सञ्चालन भइरहेको जानकारी गराए। उनले एआई जर्नी सम्मेलनमा राष्ट्रपति पुटिन स्वयंले विजेताहरूलाई सम्मान गरेको सन्दर्भ उल्लेख गर्दै भने, “यो राम्रो सङ्केत हो – राष्ट्रप्रमुखले व्यक्तिगत रूपमा तपाईंहरूमाथि विश्वास व्यक्त गर्नुभएको छ।”

मन्त्रालयका अनुसार गत वर्ष (सन् २०२५) मा यस ओलम्पियाडका लागि कीर्तिमानी ५२ हजारभन्दा बढी विद्यार्थीले आवेदन दिएका थिए। अन्तिम चरणमा पुग्न प्रतिस्पर्धा गर्ने दर प्रति सिट ८०० भन्दा बढी रहेको थियो, जसमध्ये ६२ जना मात्र अन्तिम चरणमा प्रवेश गर्न सफल भएका थिए। चेर्निसेन्कोले यस्तो नतिजाको श्रेय विभिन्न क्षेत्रका सूचना प्रविधि तथा गणित शिक्षक, प्रशिक्षक र अभिभावकहरूको सामूहिक प्रयासलाई दिए।

शिक्षामन्त्री सेर्गेई क्राभ्त्सोभले यो ओलम्पियाड लगातार छैटौं वर्ष आयोजना भइरहेको र पछिल्ला पाँच वर्षमा रुसका सबै क्षेत्रबाट एक लाखभन्दा बढी विद्यार्थीले सहभागिता जनाइसकेको तथ्याङ्क प्रस्तुत गरे। सन् २०२५ मा पहिलो पटक यो प्रतियोगितालाई अन्तर्राष्ट्रिय स्वरूप प्रदान गरिएको थियो, जसमा २६ देशका १३७ प्रतिस्पर्धी सहभागी भएका थिए।

यसै क्रममा सन् २०२५ का विजेता तथा पुरस्कार विजेताहरूले आफ्ना एआई परियोजनाहरूको प्रस्तुति दिए। जसमा नोभोसिबिर्स्कका सेम्योन रोदिओनोभद्वारा विकसित ‘ग्रेम एआई’ (अनलाइन प्रसारण मोडरेसन प्रणाली) र ड्रोनको वास्तविक समय विश्लेषण गर्ने ‘सेफिक्सड्रोन्स’ प्रविधि समावेश थियो। सिरियस सङ्घीय क्षेत्रका आर्त्योम जालिलोभले एआई मोडलको सम्पूर्ण विकास चक्र स्वचालित रूपमा निर्माण गर्ने ‘कोम्पेटएआई’ प्रणाली प्रस्तुत गरे। यस्तै, ओर्योलका यारोस्लाभ भोरोपायेभले विद्यार्थीहरूलाई एआईका लागि तयार पार्ने शैक्षिक कार्यक्रम ‘रोड टु एजीआई’ बारे जानकारी गराए।

नोभोसिबिर्स्ककै अर्का सहभागी आर्त्योम गोन्चारोभले सफ्टवेयर कोडमा भएका कमजोरी पत्ता लगाई समाधान गर्ने ‘कीक्लोजएआई’ प्रणालीको प्रदर्शन गरे। सोही सहरको ‘नादेज्दा सिबिरी’ लाइसियम नम्बर २२ का शिक्षक युरी किरिलेन्कोले एकै विद्यालयबाट १८ जना विद्यार्थीलाई अन्तिम चरणमा पुर्याउन सफल भएको तथा तीमध्ये ३ जनाले पुरस्कार जितेको उपलब्धिको अनुभव सुनाए।

उपप्रधानमन्त्री चेर्निसेन्कोले विजेता विद्यार्थीहरूको परियोजनालाई सम्भावित साझेदार कम्पनीहरूसमक्ष प्रस्तुत गर्ने व्यवस्था मिलाउन निर्देशन दिँदै उनीहरूका लागि इन्टर्नसिप र मेन्टरसिप कार्यक्रमको महत्त्वमा जोड दिए।