रुसी विज्ञान प्रतिष्ठानको गरिमा सुदृढ : एक वर्षमै चार सयभन्दा बढी दस्तावेजको विशेषज्ञ परीक्षण
मस्को – रुसी उपप्रधानमन्त्री दिमित्री चेर्निसेन्कोले रुसी विज्ञान प्रतिष्ठान (आरएएन) का अध्यक्ष गेन्नादी क्रास्निकोभसँग कार्यकारी भेटवार्ता गरेका छन्। भेटका क्रममा उपप्रधानमन्त्री चेर्निसेन्कोले रुसी विज्ञान प्रतिष्ठानले देशको प्रमुख विशेषज्ञ निकायका रूपमा आफ्नो अधिकारलाई हरेक वर्ष थप सुदृढ बनाउँदै लगेको धारणा व्यक्त गरे।
उपप्रधानमन्त्रीले जानकारी गराएअनुसार, प्रतिष्ठान अन्तर्गत रहेको सरकारी वैज्ञानिक–प्राविधिक विकास आयोगको वैज्ञानिक–प्राविधिक परिषद्ले गत वर्ष मात्र ४०० भन्दा बढी दस्तावेजहरूको विशेषज्ञ परीक्षण (एक्सपर्टाइज) सम्पन्न गरेको छ।
चेर्निसेन्कोले भने, “राष्ट्रपति भ्लादिमिर पुटिनको निर्देशनमा उक्त वैज्ञानिक–प्राविधिक परिषद्ले प्राविधिक नेतृत्व सुनिश्चित गर्ने राष्ट्रिय परियोजनाहरूको वैज्ञानिक तथा जनशक्ति पक्षको अनुगमन गरिरहेको छ। यस कार्यले राष्ट्रप्रमुखले तोकेको राष्ट्रिय लक्ष्य प्राप्तिमा ठूलो योगदान पुर्याइरहेको छ।”
यसैगरी, ‘विज्ञान तथा प्रविधि दशक’ अन्तर्गत ‘नाउका’ प्रकाशन गृहको ३००औं वार्षिकोत्सवका अवसरमा विविध कार्यक्रम आयोजनाको तयारी भइरहेको जानकारी पनि भेटमा दिइयो।
प्रतिष्ठानका अध्यक्ष गेन्नादी क्रास्निकोभले रुसी विज्ञान प्रतिष्ठानले आधारभूत विज्ञानको विकासमा अग्रणी भूमिका खेलिरहेको र राष्ट्रपतिको निर्णयबमोजिम सरकार मातहतका शैक्षिक सङ्घसंस्थाहरूको वैज्ञानिक गतिविधिसम्म प्रतिष्ठानको विशेषज्ञ परीक्षणको दायरा विस्तार गरिएको बताए।
प्रतिष्ठानलाई राजकीय वैज्ञानिक मूल्याङ्कन प्रणालीको विकासमा अग्रणी भूमिका प्रदान गरिएको छ भने वैज्ञानिक सङ्घसंस्थाका प्रमुखहरूको उम्मेदवारीमा सहमति प्रदान गर्ने अधिकार पनि प्रतिष्ठानलाई नै सुम्पिएको छ। क्रास्निकोभले भने, “रणनीतिक राजकीय निर्णयहरूको तयारी र ग्रहण प्रक्रियामा आज रुसी विज्ञान प्रतिष्ठानले विशेषज्ञ सहयोग उपलब्ध गराइरहेको छ। यी विषयहरू प्रतिष्ठानका वैज्ञानिक परिषद् र आयोगहरूको कार्यसूचीका साथै प्रेसिडियमको बैठकहरूमा समेत प्रतिबिम्बित हुने गरेका छन्।”
