चीन र क्यानडाबीच हवाई उडान विस्तार गर्ने सहमति, मालवाहक कोटा साताको २० उडान पुर्याइयो
बेइजिङ — चीन र क्यानडाबीच बढ्दो आर्थिक तथा व्यापारिक आदानप्रदान र सीमापार यात्राको मागलाई सम्बोधन गर्न दुई देशबीच यात्रुवाहक तथा मालवाहक हवाई उडान सङ्ख्या थप वृद्धि गरिने भएको छ। चिनियाँ नागरिक उड्डयन प्रशासन (सीएएसी) ले मङ्गलबार यसबारे जानकारी गराएको हो।
प्रशासनका अनुसार दुई देशका नागरिक उड्डयन निकायबीच भएको नयाँ चरणको वार्तापछि उडान वृद्धिको यो व्यवस्था तय गरिएको हो।
यस व्यवस्थाअन्तर्गत दुवै पक्ष चीन र क्यानडाबीच यात्रुवाहक उडान थप वृद्धि गर्न र हरेक पक्षको साप्ताहिक मालवाहक उडान कोटालाई १० बाट बढाएर २० पुर्याउन सहमत भएका छन्। साथै, दुवै देशका विमान कम्पनीलाई एकअर्काको भूभागभित्र रहेका सम्पूर्ण गन्तव्यहरूमा पहुँचको व्यवस्था गरिएको छ।
हाल दुई देशबीच सातामा ३५ वटा नियमित यात्रुवाहक उडान र ५ वटा नियमित मालवाहक उडान सञ्चालन भइरहेका छन्।
