यासुकुनी तीर्थमा जापानी प्रधानमन्त्रीको अनुष्ठानिक भेटीप्रति चीनको कडा विरोध र निन्दा

बेइजिङ — जापानी प्रधानमन्त्री सानाए ताकाइचीले मङ्गलबार जापानी सैन्यवाद र युद्धकालीन आक्रमणको प्रतीक मानिने कुख्यात यासुकुनी तीर्थमा अनुष्ठानिक भेटी (रिचुअल अफरिङ) पठाएपछि चीनले यसप्रति कडा विरोध र निन्दा जनाएको छ। चिनियाँ परराष्ट्र मन्त्रालयका प्रवक्ता गुओ च्याकुनले मङ्गलबार नियमित पत्रकार सम्मेलनमा जापान समक्ष कडा धारणा राखिएको र विरोध जनाइएको जानकारी दिए।

प्रवक्ता गुओले यासुकुनी तीर्थ आक्रमणकारी युद्धका लागि जिम्मेवार जापानी सैन्यवादीहरूको आध्यात्मिक औजार र प्रतीक भएको र यो वास्तवमा युद्ध अपराधीहरूको तीर्थस्थल भएको स्पष्ट पारे। उनले यासुकुनी युद्ध तीर्थसँग सम्बन्धित जापानका यी नकारात्मक कदमहरू युद्धको जिम्मेवारीबाट भाग्ने प्रयास, न्यायप्रतिको अपमान, जापानी युद्ध पीडितहरूप्रतिको उत्तेजना र दोस्रो विश्वयुद्धको विजयको परिणामप्रतिको चुनौती भएको बताए। यस्ता कदमहरूको अन्तर्राष्ट्रिय समुदायले व्यापक निन्दा र दृढ अस्वीकार गरेको उनको भनाइ छ।

प्रवक्ता गुओले जापानले गम्भीर आत्मसमीक्षा गर्नुपर्ने बताउँदै भने, “के जापानले सैन्यवादको छायाँ फैलिन दिइरहने, ऐतिहासिक तथ्यलाई बङ्ग्याउने र आक्रमणकारी युद्धका बेलाका आफ्ना अपराधलाई सेतो धुवाँ लगाउने काम जारी राख्ने हो? वा आफ्ना युद्ध अपराधहरूप्रति गहिरो र इमानदार आत्मचिन्तन गर्ने, सही इतिहास दृष्टिकोण निर्माण गर्ने र आफ्ना एसियाली छिमेकीहरू तथा अन्तर्राष्ट्रिय समुदायको विश्वास जित्ने हो?”

उनले जापानले सैन्य बजेटमा ठूलो वृद्धि गरेको, मध्यम दूरीका आक्रामक क्षेप्यास्त्र तैनाथ गरेको, हतियार निर्यात प्रतिबन्ध खुकुलो पारेको, शान्तिवादी संविधान संशोधन प्रस्ताव गरेको र तीन गैरआणविक सिद्धान्त त्याग्ने विचार अघि सारेको सन्दर्भ उल्लेख गर्दै प्रश्न गरे, “यी सबै पृष्ठभूमिमा जापानले आफूलाई ‘शान्तिप्रिय देश’ कसरी भन्न सक्छ र वास्तवमा जापान के गर्न खोज्दैछ?”

प्रवक्ता गुओले जापानले स्पष्ट रूपमा देख्नुपर्ने कुरा के हो भने संसारका सबै शान्तिप्रिय र न्यायप्रेमी शक्तिहरूले नव–सैन्यवाद फैलिन र क्षेत्रीय शान्तिलाई धम्क्याउन कहिल्यै अनुमति दिने छैनन्, बरु यसको दृढतापूर्वक जवाफ दिनेछन्।

“इतिहासको विस्मृति भनेको विश्वासघात हो, र जिम्मेवारीको अस्वीकार भनेको अपराध दोहोर्याउने सङ्केत हो,” गुओले भने। उनले अन्तर्राष्ट्रिय समुदायलाई जापानको ऐतिहासिक पुनरावलोकनवादप्रति सतर्क रहन, यसको नव–सैन्यवादी प्रवृत्तिको दृढतापूर्वक विरोध गर्न र क्षेत्र तथा विश्व शान्ति एवं स्थिरता कायम राख्न सहकार्य गर्न आह्वान गरे।