सम्पादक किशोर श्रेष्ठको दाबी : राजीनामा नदिएको भए गुरुङ गम्भीर कानुनी जटिलतामा पर्थे
काठमाडौँ — साप्ताहिक पत्रिका जनआस्थाका सम्पादक किशोर श्रेष्ठले गृहमन्त्री सुधन गुरुङको राजीनामाबारे प्रतिक्रिया दिँदै उनले राजीनामा नदिएको भए गम्भीर कानुनी जटिलतामा फस्न सक्ने बताएका छन्।
सामाजिक सञ्जालमार्फत आफ्नो धारणा सार्वजनिक गर्दै श्रेष्ठले गुरुङसँग सम्बन्धित विषयमा आफूहरूले प्रकाशित गरेको शृङ्खलाबद्ध समाचारपछि नै उक्त प्रकरण बाहिर आएको दाबी गरेका छन्। उनले आफ्नो समाचारलाई लिएर केही समूहले गालीगलौज र आरोप लगाएर विषयान्तर गर्न खोजेको पनि उल्लेख गरेका छन्।
श्रेष्ठले आफूविरुद्ध लगाइएका आरोपहरू आधारहीन भएको बताउँदै आफ्नो ३८ वर्षे पत्रकारिता जीवनमा कहिल्यै इमान नबेचेको दाबी गरेका छन्। उनले भनेका छन्, “यदि हामीमाथि लगाइएका कुनै पनि आरोप प्रमाणित गर्न सकिन्छ भने हामी कानुनी कारबाही भोग्न तयार छौं।”
उनले विगतमा केपी शर्मा ओली, शेरबहादुर देउवा र पुष्पकमल दाहाल ‘प्रचण्ड’ जस्ता शीर्ष नेतामाथि समेत आलोचनात्मक समाचार लेखेको उल्लेख गर्दै आफ्नो पत्रकारिता निष्पक्ष रहेको दाबी गरेका छन्।
श्रेष्ठका अनुसार उक्त प्रकरणमा आफूलाई मौन बस्न दबाब समेत आएको थियो। तर उनले पत्रकारिताको धर्मअनुसार सत्य बाहिर ल्याउने कामबाट पछि नहटेको बताएका छन्।
गुरुङ प्रकरणसँगै मिडिया र राजनीतिबीचको सम्बन्ध, पत्रकारिताको निष्पक्षता र सार्वजनिक पद धारण गर्ने व्यक्तिहरूको उत्तरदायित्वबारे नयाँ बहस सुरु भएको छ। यस घटनाले पारदर्शिता र सुशासनका मुद्दाहरूलाई पुनः केन्द्रमा ल्याएको छ। श्रेष्ठको यो अभिव्यक्तिले गुरुङ राजीनामाप्रकरणले अर्को कोण पाएको छ। उनले आफूले गरेको पत्रकारिता नै सत्य तथ्यमा आधारित रहेको र कुनै दबाबमा नअटेको प्रस्ट पारेका छन्।
