अर्को महासचिवका लागि संयुक्त राष्ट्रसंघीय महासभामा चार उम्मेदवारबीच अन्तरक्रिया सम्पन्न
संयुक्त राष्ट्रसंघ — संयुक्त राष्ट्रसंघीय महासभाले अर्को महासचिवको पदका लागि उम्मेदवारहरूसँगको दुईदिने अन्तरक्रियात्मक संवाद बुधबार सम्पन्न गरेको छ।
उक्त पदका लागि चार जना उम्मेदवारले संवादमा भाग लिएका छन्। उनीहरूमा पूर्व चिली राष्ट्रपति तथा पूर्व संयुक्त राष्ट्रसंघीय मानवअधिकार उच्चायुक्त मिसेल बाशेलेट (ब्राजिल र मेक्सिकोको मनोनयन), अन्तर्राष्ट्रिय आणविक ऊर्जा एजेन्सीका वर्तमान महानिर्देशक राफाएल ग्रोसी (अर्जेन्टिनाको मनोनयन), पूर्व सेनेगल राष्ट्रपति माकी साल (बुरुन्डीको मनोनयन), र अर्थशास्त्री तथा पूर्व कोस्टारिका उपराष्ट्रपति रेबेका ग्रिन्स्प्यान (कोस्टारिकाको मनोनयन) रहेका छन्।
तीन घण्टे संवादका क्रममा उम्मेदवारहरूले आफ्नो दृष्टिकोण प्रस्तुत गरेका थिए र संयुक्त राष्ट्रसंघका सदस्य राष्ट्रहरू तथा नागरिक समाजका तर्फबाट नेतृत्व क्षमता, अनुभव, योग्यता, सुधार, तथा संयुक्त राष्ट्रसंघका तीन स्तम्भ – शान्ति तथा सुरक्षा, दिगो विकास, र मानवअधिकार – सम्बन्धी प्रश्नहरूको जवाफ दिएका थिए।
मंगलबार संवाद सुरु हुनुभन्दा अघि पत्रकारहरूसँगको कुराकानीमा महासभाकी अध्यक्ष एनालेना बेरबकले महासचिवको चयनले व्यापक परिणाम ल्याउने बताइन्। उनले भनिन्, “हाम्रो छनोटले विश्वको अद्वितीय बहुपक्षीय संगठनको दिशा निर्धारण गर्नेछ र संयुक्त राष्ट्रसंघले विश्वभरका ८ अर्बभन्दा बढी मानिसहरूको वास्तविक प्रतिनिधित्व गर्छ कि गर्दैन भन्ने प्रदर्शन गर्नेछ।”
बेरबकले भनिन्, अर्को महासचिवलाई विश्वव्यापी चुनौतीहरूको सामना गर्ने मात्रै होइन, करिब ८० वर्षअघि दुई विश्वयुद्धको खरानीबाट जन्मेको संगठनले २१औँ शताब्दीका चुनौतीहरूको सामना गर्न सक्ने सुनिश्चित गर्न आवश्यक सुधारहरू अगाडि बढाउने जिम्मेवारी समेत दिइनेछ।
संयुक्त राष्ट्रसंघको नवौँ तथा वर्तमान महासचिव एन्टोनियो गुटेर्रेसले सन् २०१७ जनवरीमा पदभार ग्रहण गरेका थिए। अर्को महासचिवले सन् २०२७ जनवरी १ देखि पदभार सम्हाल्नेछन्।
