इरानद्वारा दुई युरोपेली जहाज जबरजस्ती कब्जा, अमेरिकाले ‘समुद्री डकैती’ को संज्ञा दियो
वासिङ्टन डीसी — अमेरिकी राष्ट्रपति डोनाल्ड ट्रम्पले हर्मुज जलसन्धि नजिक इरानले दुई युरोपेली जहाज बलपूर्वक कब्जा गरेको घटनालाई अमेरिका–इरानबीच विस्तारित युद्धविरामको उल्लङ्घन नमानेको व्हाइट हाउसले जनाएको छ।
बुधबार फक्स न्यूजमा बोल्दै व्हाइट हाउसकी प्रेस सचिव क्यारोलिन लेभिटले भनिन्, “ती अमेरिकी जहाज थिएनन्। ती इजरायली जहाज पनि थिएनन्। ती दुई अन्तर्राष्ट्रिय जहाज थिए।”
उनले भनिन्, “ती दुई जहाज द्रुत गतिका गनबोटद्वारा कब्जामा लिइएका थिए। इरान मध्यपूर्वको सबैभन्दा घातक नौसेना हुँदै अहिले समुद्री डाकूको जस्तो व्यवहार गर्न थालेको छ। उनीहरूको जलसन्धिमाथि नियन्त्रण छैन। यो समुद्री डकैती हो जुन हामी देखिरहेका छौं।”
यसअघि बुधबार इरानको इस्लामिक क्रान्ति रक्षक ब्रिगेडले दुई वटा जहाज कब्जा गरेको घोषणा गरेको थियो। ती जहाजहरूले कथित रूपमा उचित अधिकार बिना सञ्चालन गरेको, नियमावली बारम्बार उल्लङ्घन गरेको र नेभिगेसन प्रणालीमा हेरफेर गरेको इरानको भनाइ छ।
इरानी अर्धसरकारी फार्स समाचार एजेन्सीका अनुसार आरजीसीले बुधबार ग्रीक स्वामित्वको युफोरिया नामक जहाजलाई समेत निसाना बनाएको थियो। तेस्रो ‘उल्लङ्घनकारी जहाज’ हर्मुज जलसन्धि पार गर्ने प्रयासक्रममा रहेको थियो जुन अहिले इरानको तटमा अलपत्र परेको छ।
यस घटनाले हर्मुज जलसन्धि क्षेत्रमा बढ्दो तनावलाई उजागर गरेको छ। विश्वको महत्वपूर्ण तेल व्यापारिक मार्ग मानिने यस जलसन्धिमा हालैका दिनमा धेरै सुरक्षा घटनाहरू घटेका छन्। अमेरिकाले इरानको यो कार्यलाई समुद्री डकैको संज्ञा दिए पनि आफ्नो विस्तारित युद्धविरामको उल्लङ्घन भने नमानेको स्पष्ट पारेको छ। इरानले भने आफ्नो कार्यलाई उचित ठहराउँदै क्षेत्रमा नियम उल्लङ्घन नियन्त्रण गर्न आवश्यक कदम भएको जनाएको छ।
