नेपाली भूमि छिमेकीविरुद्ध दुरुपयोग हुन दिँदैनौँ : अर्थमन्त्री वाग्ले, चीनसँगको मैत्री उच्च प्राथमिकतामा

काठमाडौँ — अर्थमन्त्री डा. स्वर्णिम वाग्लेले कुनै पनि छिमेकीविरुद्ध नेपाली भूमि दुरुपयोग हुन नदिने प्रतिबद्धता व्यक्त गर्दै विकासको विश्वासिलो साझेदार चीनसँगको मैत्रीलाई सरकारले उच्च प्राथमिकता दिएको बताउनुभएको छ।

काठमाडौँस्थित चिनियाँ दूतावासले बुधबार साँझ आयोजना गरेको ‘वसन्तको आवाज : गीतसङ्गीतका साथ भित्री मङ्गोलियाको यात्रा’ कार्यक्रममा अर्थमन्त्री डा. वाग्लेले नेपालको सामाजिक–आर्थिक विकासमा चीन सरकारबाट प्राप्त सहयोगप्रति आभार व्यक्त गर्नुभयो। उहाँले चीनसँगको दिगो सम्बन्ध भविष्यमा अझ सुदृढ हुने विश्वास व्यक्त गर्दै चीन र नेपालबीचका भौगोलिक एवं सांस्कृतिक समानताका विविध पक्ष सुनाउनुभयो। भित्री मङ्गोलियाको सांस्कृतिक वैभव द्विदेशीय सांस्कृतिक आदानप्रदानका लागि महत्त्वपूर्ण रहेको उहाँको भनाइ थियो।

शान्तिपूर्ण सहअस्तित्वका पाँच सिद्धान्त (पञ्चशील) मा आधारित नेपाल–चीन सम्बन्धलाई भूपरिवेष्टितबाट भूजडित तुल्याउन चिनियाँ पक्षबाट भएको सहयोगको सराहना गर्दै अर्थमन्त्री डा. वाग्लेले चीनले हासिल गरेको विकासबाट नेपालले सिक्न चाहेको बताउनुभयो। उहाँले राष्ट्रिय स्वतन्त्र पार्टीले आफ्नो घोषणापत्रमा चिनियाँ समृद्धि र त्यसबाट नेपालले पाठ सिक्दै आर्थिक समृद्धिको मार्गमा अग्रसर हुनुपर्ने विषय समावेश गरेको पनि उल्लेख गर्नुभयो।

चिनियाँ सहयोगमा निर्मित चक्रपथ, त्यसको विस्तार, केरुङ–काठमाडौँ सडक, रेलमार्गको सम्भाव्यता अध्ययन, मदन भण्डारी विश्वविद्यालय, निजामती अस्पताललगायत मुलुकको भौतिक पूर्वाधारमा प्राप्त सहयोग अतुलनीय रहेको अर्थमन्त्री डा. वाग्लेले बताउनुभयो। नेपालमा चिनियाँ बैंक स्थापना, कृषि, पर्यटनलगायत पारस्परिक लाभका क्षेत्रमा अझ घनीभूत साझेदारीका लागि चिनियाँ पक्षसँग छलफल जारी रहेको जानकारी दिँदै उहाँले नेपालको चौतर्फी विकासका लागि दृढ सङ्कल्पका साथ क्रियाशील वर्तमान सरकारले सुशासन, अर्थतन्त्र र समृद्धिलाई केन्द्रमा राखेको उल्लेख गर्नुभयो।

राष्ट्रियसभाका उपाध्यक्ष लीलाकुमारी भण्डारीले एकचीन सिद्धान्तप्रति नेपाल पूर्ण प्रतिबद्ध रहेको बताउँदै पञ्चशीलका सिद्धान्तमा आधारित दुई देशबीचको सम्बन्धलाई नयाँ उचाइमा पुर्याउनुपर्नेमा जोड दिनुभयो। उहाँले नेपालको भरपर्दो विकास साझेदार चीनबाट निरन्तर प्राप्त सहयोगप्रति कृतज्ञता ज्ञापन गर्दै सात दशक पुरानो नेपाल–चीन सम्बन्ध आर्थिक, सामाजिक एवं सांस्कृतिक क्षेत्रमा पनि सघन हुँदै गएकोमा प्रसन्नता प्रकट गर्नुभयो।

नेपालका लागि चीनका राजदूत चाङ माओमिङले चीन–नेपाल मैत्री तथा सहयोगका लागि नेपाल सरकार र नेपाली जनताप्रति आभार व्यक्त गर्दै नेपालको संस्कृति एवं प्राकृतिक सौन्दर्यबाट आफू मन्त्रमुग्ध भएको बताउनुभयो। चीन–नेपाल रणनीतिक साझेदारीलाई अनन्तकालसम्म चिरस्थायी बनाउन प्रतिबद्ध रहेको बताउँदै उहाँले ‘बेल्ट एण्ड रोड’ को माध्यमबाट नेपालको विकास प्रयासमा अझ सहयोग गर्ने चिनियाँ चाहना सुनाउनुभयो। हालै चीनले पारित गरेको १५औँ पञ्चवर्षीय योजना चीनको विकासका लागि मात्र नभई छिमेकी राष्ट्रहरूको उन्नयनमा पनि सहयोगी हुने विश्वास राजदूत चाङले व्यक्त गर्नुभयो। जनस्तरको द्विदेशीय सम्बन्धलाई अझ सुदृढ बनाउन हरसम्भव प्रयत्न गर्ने दृढता दोहोर्याउँदै उहाँले विगतमा भएका सहमति एवं सम्झौता कार्यान्वयन गर्ने प्रतिबद्धता व्यक्त गर्नुभयो।

सो अवसरमा भित्री मङ्गोलिया स्वायत्त प्रदेशका कलाकारहरूले भित्री मङ्गोलियाको लोक संस्कृति, गीतसङ्गीत प्रस्तुत गरेका थिए। कार्यक्रममा मन्त्रिपरिषद्का सदस्य, पूर्वप्रधानमन्त्री, विभिन्न राजनीतिक दलका नेता, पूर्वसभामुख, कूटनीतिक नियोगका प्रमुख तथा पदाधिकारी, नेपालमा रहेका चिनियाँ नागरिक तथा समाजका प्रतिष्ठित व्यक्तिहरू सहभागी रहेको जनाएको छ।