सिक्किमको स्वर्ण जयन्तीमा प्रधानमन्त्री मोदीको भ्रमण : ‘एकताका १००० पाइला’ सांस्कृतिक प्रस्तुति
गान्तोक — सिक्किमले आफ्नो राज्य स्थापनाको ५० वर्ष (स्वर्ण जयन्ती) को अवसर पारेर अप्रिल २७–२८ मा भारतीय प्रधानमन्त्री नरेन्द्र मोदीलाई स्वागत गर्ने तयारी गरेको छ। मुख्यमन्त्री प्रेमसिंह तामाङ गोलेको नेतृत्वमा राज्यले उच्च प्रशासनिक तयारी पूरा गरेको सिक्किम मुख्यमन्त्रीको प्रेस सचिवले जारी गरेको विज्ञप्तिमा उल्लेख छ।
प्रधानमन्त्री मोदीको स्वागतका लागि गान्तोकको पाल्जोर स्टेडियममा २८ अप्रिलमा ठुलो सार्वजनिक समारोह आयोजना हुनेछ। २७ अप्रिलमा भव्य रोड शो गरिनेछ, जसमा स्वयं सहायता समूह, लाखपति दिदी, आशा कार्यकर्ता, आंगनवाडी कार्यकर्ता, निजी कम्पनी, राजनीतिक प्रतिनिधि, नागरिक समाज र विभिन्न वर्गका नागरिक सहभागी हुनेछन्।
२८ अप्रिलको सांस्कृतिक कार्यक्रमको मुख्य आकर्षण ‘एकताका १००० पाइला’ हुनेछ, जसमा करिब २ हजार कलाकार (अल सिक्किम डान्स इन्स्टिच्युट एसोसिएसन, सङ्गीतकार, सामुदायिक कलाकार तथा स्वयं सहायता समूह प्रतिनिधि) सहभागी हुनेछन्। यसले सिक्किमको विविधता र भारतीय सांस्कृतिक परम्परासँगको एकतालाई प्रदर्शन गर्ने लक्ष्य राखिएको छ।
प्रधानमन्त्री मोदीले राज्यभरिका विभिन्न नवीन पूर्वाधार परियोजनाको उद्घाटन र आधारशिला राख्ने कार्यक्रमसमेत रहेको छ। मुख्यमन्त्री तामाङले स्वयं सुरक्षा, भीड व्यवस्थापन, पूर्वाधार तयारी र विपद् पूर्वयोजनाको उच्चस्तरीय समीक्षा गरेका छन्।
प्रेस सचिव युगन तामाङले जारी गरेको विज्ञप्तिमा भनिएको छ, ‘सिक्किम, मुख्यमन्त्री प्रेमसिंह तामाङ गोलेको नेतृत्वमा, सानो राज्यले पनि शासन र जनपरिचालनमा उच्च मापदण्ड स्थापित गर्न सक्ने उदाहरण प्रस्तुत गरिरहेको छ।’
