इरान शान्ति वार्ताका लागि तयार, तर अमेरिकी गम्भीरतामाथि शंका : राजदूत जलाली
बेइजिङ – इरान वार्ताको टेबुलमा फर्किन तयार रहेको तर अमेरिकाको इमानदारीमाथि प्रश्न उठाएको छ। इरानले शान्ति प्राप्तिका लागि वासिङ्टनसँग वार्ता पुनः सुरु गर्न आफू तयार रहेको, तर अमेरिकी नियतप्रति आशंका रहेको स्पष्ट पारेको हो।
रुसका लागि इरानी राजदूत काजेम जलालीले बिहीबार भनेका छन्, “हामी यी वार्ताको परिणामस्वरूप ठोस लक्ष्य र उद्देश्यहरू प्राप्त होस् भन्ने चाहन्छौं। उनीहरू (संयुक्त राज्य अमेरिका) ले यी वार्ताका सर्त र नतिजाहरू निर्धारण गर्नु हुँदैन, ताकि हामी यस क्षेत्रभरि दिगो र दीर्घकालीन शान्ति प्राप्त गर्न सकौं।”
जलालीले स्थगित वार्ताहरू पुनः सुरु गर्न इरान तयार रहेको बताए। यद्यपि, उनले सावधान गराउँदै भने कि सर्तहरू निर्धारण गर्ने, छलपूर्ण अभ्यासहरूमा संलग्न हुने, वा जानाजानी प्रक्रिया लम्ब्याउनेमा आधारित कुनै पनि अमेरिकी दृष्टिकोण अस्वीकार्य हुनेछ।
उनले इरान यस द्वन्द्व समाधानका लागि कूटनीतिक बाटोमा प्रतिबद्ध रहेको, तर वासिङ्टनमा वार्ताप्रति सोही दृष्टिकोण नदेखिएको पनि बताए। जलालीले भने, “इरानले संयुक्त राज्य अमेरिकाको तर्फबाट (वार्ताप्रति) गम्भीर दृष्टिकोण देखिरहेको छैन।”
उनले संयुक्त राज्य अमेरिका र इजरायलद्वारा इरानमाथि थोपरिएको असमान युद्धबाट इरान विजयी भएर निस्किएको दाबी गरे। जलालीले भने, “उनीहरूले इरानविरुद्ध आफ्नो सम्पूर्ण सैन्य क्षमता प्रयोग गरे, तर परिणाम इरानको लागि ऐतिहासिक विजय थियो।”
