माली आक्रमण : संयुक्त राष्ट्र प्रमुखले गरेको हिंसाको कडा निन्दा
संयुक्त राष्ट्र मुख्यालय — संयुक्त राष्ट्र महासचिव एन्टोनियो गुटेरेसले मालीमा भएको आक्रमणको रिपोर्टप्रति गहिरो चिन्ता व्यक्त गर्दै हिंसाको कडा निन्दा गरेका छन्। महासचिवको प्रवक्ता स्टेफान डुजारिकले शनिबार जारी विज्ञप्तिमा यो जानकारी दिएका हुन्।
महासचिवले मालीको जनताप्रति एकता व्यक्त गर्दै नागरिक तथा नागरिक पूर्वाधारको सुरक्षाको आवश्यकतामा जोड दिएको प्रवक्ताले बताए। विज्ञप्तिमा भनिएको छ, ‘महासचिवले साहेल क्षेत्रमा विकसित हिंसात्मक उग्रवाद तथा आतंकवादको खतरा सम्बोधन गर्न र तत्काल मानवीय सहायताको आवश्यकता पूरा गर्न समन्वयित अन्तर्राष्ट्रिय समर्थनको आह्वान गर्दछन्। उनले सम्पूर्ण क्षेत्रमा बलियो सुरक्षा समन्वय र सहकार्यको लागि आफ्नो आह्वान दोहोर्याउँछन्।’
उल्लेखित छ, मालीको संक्रमणकालीन सरकारले शनिबार साँझ आतंककारी समूहहरूले विभिन्न सहरहरूमा समन्वित आक्रमण गरेको र १६ जना घाइते भएको जनाएको थियो। सरकारका अनुसार मालीको रक्षा तथा सुरक्षा बलले आक्रमणलाई नियन्त्रणमा लिइसकेको छ भने धेरै आतंककारी मारिएका छन् र आक्रमणको योजना विफल पारिएको छ।
