दक्षिण कोरियाको युइवाङमा अपार्टमेन्टमा आगलागी, एकको मृत्यु, दुई घाइते
काठमाडौं — दक्षिण कोरियाको ग्योङ्गी प्रान्तस्थित युइवाङ सहरको एक अपार्टमेन्टमा बिहीबार आगलागी हुँदा एक जनाको मृत्यु भएको छ भने दुई जना सामान्य घाइते भएका छन्।
स्थानीय समयअनुसार बिहीबार बिहान करिब साढे १० बजे युइवाङको नाएसोन–दोङस्थित २० तले अपार्टमेन्ट भवनमा आगो लागेको योनहाप समाचार समितिले जनाएको छ। आगलागीबाट बच्न भाग्ने क्रममा एक जना अपार्टमेन्टबाट खसेर मृत्यु भएको हो। मृतकको पहिचान खुल्न सकेको छैन भने आन्तरिक खोजी जारी रहेकाले मृतक सङ्ख्या बढ्न सक्ने अधिकारीहरूले चेतावनी दिएका छन्।
दर्जनौं प्रत्यक्षदर्शीको रिपोर्टपछि आगलागी नियन्त्रण विभागले बिहान १०:४५ बजे पहिलो तहको प्रतिक्रिया जारी गर्दै २० वटा दमकल र ७० भन्दा बढी अग्नि नियन्त्रक परिचालन गरेको थियो। मुख्य आगो करिब ११:२१ बजे नियन्त्रणमा आएको छ। प्रभावित भवनमा २० तला र एक तहघरसहित कूल ८८०० वर्गमिटर क्षेत्रफल र ७८ घरधुरी रहेको योनहापले जनाएको छ। पूर्ण रूपमा आगो निभेपछि क्षतिको विवरण र आगलागीको कारण पत्ता लगाइने अधिकारीहरूले बताएका छन्।
