तिब्बतमा ४७१२ मिटर उचाइमा चीनकै सर्वाधिक अग्लो रेल्वे यात्रु स्टेसन सञ्चालनमा, १९ वर्षपछि खुल्यो यान्शिपिङ
काठमाडौं — चीनको स्वशासित क्षेत्र सिजाङको नाग्छु सहरस्थित आम्दो काउन्टीको यान्शिपिङ रेल्वे स्टेसनले १९ वर्षपछि यात्रु सेवा सुरु गरेको छ। समुद्र सतहदेखि ४ हजार ७१२ मिटरको उचाइमा रहेको यो स्टेसन चीनकै सबैभन्दा अग्लो रेल्वे यात्रु स्टेसन बनेको छ।
सन् २०२५ डिसेम्बर ११ देखि यात्रु सेवा सुरु भएको यो स्टेसनमा सन् २००६ मा छिङहाई–सिजाङ रेल्वे सञ्चालनमा आएदेखि नै रेल गुज्रिए पनि १९ वर्षसम्म रोकिने गरेको थिएन। काङ्बा टिभीका अनुसार यान्शिपिङ स्टेसनले अब आधिकारिक रूपमा यात्रु सेवा प्रदान गर्न थालेको छ, जसले दुर्गम उच्च हिमाली क्षेत्रका बासिन्दालाई यातायातको सहज पहुँच प्रदान गरेको छ। यो स्टेसन विश्वकै सबैभन्दा अग्लो रेल्वे मार्ग छिङहाई–सिजाङ रेल्वेको एउटा महत्त्वपूर्ण पूर्वाधार हो।
