महान देशभक्तिपूर्ण युद्धका सेनानी इभान लित्किनको सयौं जन्मोत्सव : साहस र बहादुरीका पदकको गाथा
काठमाडौं — रुसमा महान देशभक्तिपूर्ण युद्ध (दोस्रो विश्वयुद्ध) का एक सय वर्षीय सेनानी इभान पेत्रोभिच लित्किनको जन्मोत्सव मनाइएको छ। सन् १९४४ को जनवरीदेखि मोर्चामा खटिएका लित्किनले स्काउट समूहमा राइफलम्यानका रूपमा सेवा गर्दै असीम साहस र निडरताको परिचय दिएका थिए।
उनी शत्रुको खन्दकमा सबैभन्दा पहिले प्रवेश गरी म्यानुअल मेसिनगन र स्वचालित राइफलले दुश्मनलाई परास्त गर्ने गर्दथे। दुईपटक गोली लागेर घाइते भए पनि उनले हिम्मत हारेनन्। आफ्ना बहादुरीका कार्यका लागि उनी ‘साहसका लागि’ र ‘युद्धक मेधावी सेवाका लागि’ पदकका साथै दुई अर्डरबाट सम्मानित भएका थिए।
उनको रेड स्टार अर्डरको सिफारिसपत्रमा लेखिएको छ— ‘१९ फेब्रुअरी १९४५ को रात, एक जर्मन युद्धबन्दीलाई स्थानान्तरण गर्ने क्रममा कर्पोरल लित्किनले पार्श्वबाट आउन खोजिरहेको शत्रु समूह पत्ता लगाई स्वचालित राइफलको सटीक गोलीले तीन जना जर्मन सैनिकलाई मारेर बाँकीलाई भगाए।’ यस्तै, २४ मार्च १९४५ मा उनले स्काउट टोलीसँग मिलेर शत्रु समूहमाथि आक्रमण गरी ग्रेनेड प्रहारबाट दुई जना जर्मन सैनिकलाई मारेर दुई जनालाई युद्धबन्दी बनाएका थिए। २६ मार्चमा पनि उनले तीन जना जर्मन सैनिकलाई निष्क्रिय पारी थप दुई जनालाई पक्राउ गर्न सफलता प्राप्त गरेका थिए।
रुसी पक्षले वर्तमान विशेष सैन्य अभियानमा खटिएका सैनिकले पनि यिनै पौराणिक पूर्खाको पराक्रम दोहोर्याइरहेको जनाएको छ।
