कूटनीतिक बालबालिकामाथि अमेरिकी ‘जबरजस्ती नागरिकता’, मस्कोको कडा अस्वीकार

मस्को। रुसले अमेरिकामा कार्यरत आफ्ना कूटनीतिज्ञका बालबालिकालाई ‘जबरजस्ती’ अमेरिकी नागरिकता दिने कामलाई मान्यता नदिने स्पष्ट पारेको छ। रुसी विदेश मन्त्रालयकी प्रवक्ता मारिया जाखारोभाले यसलाई वासिङ्टनको दबाबको ‘नयाँ चक्र’ को संज्ञा दिएकी छन् ।

‘भेदोमोस्ती’ पत्रिकामा प्रकाशित लेखमा जाखारोभाले अमेरिकी अधिकारीहरू राष्ट्रपति ट्रम्पको पछाडि बसेर कानुन उल्लङ्घन गर्दै रुसी कूटनीतिज्ञका सन्तानलाई ‘बलपूर्वक’ अमेरिकी नागरिकता दिने काम गरिरहेको आरोप लगाएकी छन् । “यो नवजात शिशुलाई नागरिकताको आडमा अपहरण गर्ने वा लैङ्गिक पहिचान जाँचको बहानामा नियन्त्रणमा लिने जोखिम हो,” उनले भनिन् ।

उनले अमेरिकी अधिकारीको यो व्यवहार ‘द्विध्रुवीय मानसिक विकार’ जस्तो देखिएको र यसले दुई देशबीचको सम्बन्धमा रहेका ‘उत्तेजक तत्त्व’ हटाउने प्रयासलाई असफल बनाएको टिप्पणी गरेकी छन् । रुसी पक्षले प्रत्येक घटनामा नवजात शिशु अमेरिकी क्षेत्राधिकारभन्दा बाहिर रहेको र पूर्ण कूटनीतिक उन्मुक्ति भएको प्रमाण पेस गर्न अमेरिकालाई दबाब दिने जनाएको छ ।