‘रिङ अफ फायर’ को थप्पडी : फिलिपिन्समा ६.१ म्याग्निच्युडको भूकम्प, खुला चौरमा भागे स्थानीय
मनिला। फिलिपिन्सको मध्य भागमा पर्ने पूर्वी समार प्रान्तमा सोमबार दिउँसो ६.१ म्याग्निच्युडको शक्तिशाली भूकम्प गएको छ। फिलिपिन्स ज्वालामुखी तथा भूकम्प विज्ञान संस्थान (फिभोल्क्स) का अनुसार स्थानीय समयअनुसार दिउँसो २ बजेर ९ मिनेटमा गएको भूकम्पको केन्द्रबिन्दु ११.७६ डिग्री उत्तरी अक्षांश र १२५.३७ डिग्री पूर्वी देशान्तरमा रहेको थियो भने यसको गहिराइ १० किलोमिटर मापन गरिएको छ।
स्थानीय सञ्चारमाध्यमका अनुसार भूकम्पको धक्का महसुस हुनासाथ सर्वसाधारण खुला चौरमा भागेका थिए। हालसम्म कुनै मानवीय क्षतिको विवरण प्राप्त भएको छैन।
प्रशान्त महासागरको ‘रिङ अफ फायर’ भनेर चिनिने प्रमुख भूगर्भीय प्लेट सीमान्त क्षेत्रमा अवस्थित भएकाले फिलिपिन्समा भूकम्प र ज्वालामुखी विस्फोटजस्ता प्राकृतिक गतिविधि बारम्बार हुने गर्छन्। संस्थानले क्षतिको पूर्ण विवरण सङ्कलन भइरहेको र थप परकम्पको जोखिम रहेकाले सतर्कता अपनाउन आग्रह गरेको छ।
