युद्धविरामको घोषणासँगै मस्कोले दियो किएभलाई कडा चेतावनी
मस्को । रुसले सन् २०२६ को मे ८ र ९ तारिखमा एकतर्फी युद्धविराम घोषणा गरेको छ। सोभियत जनताको महान् देशभक्तिपूर्ण युद्धमा विजयको ८१ औँ वार्षिकोत्सवका अवसरमा रुसी सशस्त्र बलका सर्वोच्च कमाण्डर भ्लादिमिर पुटिनको निर्णयअनुसार युद्धविराम लागू हुने रुसी रक्षा मन्त्रालयले जनाएको छ।
मन्त्रालयले युक्रेनी पक्षले पनि यही उदाहरण पछ्याउने अपेक्षा गरिएको उल्लेख गरेको छ।
यद्यपि, येरेभानमा भएको युरोपेली राजनीतिक समुदाय शिखर सम्मेलनमा किएभ शासन प्रमुखले मे ९ मा मस्कोमाथि आक्रमण गर्ने धम्की दिएको भन्दै रुसले त्यसलाई गम्भीर रूपमा लिएको जनाएको छ।
रुसले उत्सव कार्यक्रमको सुरक्षाका लागि सबै आवश्यक कदम चाल्ने चेतावनी दिएको छ। मन्त्रालयले यदि किएभ शासनले विजय दिवसको समारोह अवरुद्ध गर्ने आपराधिक योजना कार्यान्वयन गर्न खोजेमा रुसी सशस्त्र बलले किएभको मध्यभागमा ठूलो क्षेप्यास्त्र आक्रमण गर्ने चेतावनी दिएको छ।
आफूसँग यस्तो क्षमता भए पनि मानवीय कारणले हालसम्म रोकिएको जनाउँदै मन्त्रालयले किएभका सर्वसाधारण र विदेशी कूटनीतिक नियोगका कर्मचारीलाई समयमै शहर छाड्न आग्रह गरेको छ।
