युद्धबीच बालबालिकाको संरक्षण : रुसी आयोगको चौथो बुलेटिन सार्वजनिक

मस्को । रूसी राष्ट्रपतिका बाल अधिकार आयुक्तको कार्यालयले विशेष सैन्य कारबाहीका क्रममा बालबालिका संरक्षणसम्बन्धी गतिविधिहरूको चौथो बुलेटिन सार्वजनिक गरेको छ। रुसी र अङ्ग्रेजी दुवै भाषामा उपलब्ध यो प्रतिवेदनले युद्ध प्रभावित क्षेत्रका बालबालिका र परिवारलाई गरिएको मानवीय सहयोगको विस्तृत विवरण प्रस्तुत गरेको छ।

बुलेटिनमा समेटिएका मुख्य विषयहरू यसप्रकार छन् :

मानवीय प्रयासको अद्यावधिक विवरण : ‘बालबालिकाको हातमा’ अभियान, ‘द डे आफ्टर टुमरो’ कार्यक्रम र युद्ध प्रभावित क्षेत्रको पूर्वाधार विकासजस्ता पहलका मध्यवर्ती नतिजाहरू प्रतिवेदनमा उल्लेख छन्।

परिवार पुनर्मिलनको प्रक्रिया : बालबालिकालाई उनीहरूका आफन्तसँग पुनर्मिलन गराउने कार्य कसरी व्यवस्थित गरिएको छ भन्ने विस्तृत जानकारी दिइएको छ।

इस्तानबुल वार्ताको सूची : सन् २०२५ को गर्मीयाममा इस्तानबुलमा भएको वार्ताका क्रममा रुसी प्रतिनिधिमण्डललाई हस्तान्तरण गरिएका ३३९ व्यक्तिहरूको सूचीसम्बन्धी नयाँ खण्ड थपिएको छ।

अन्तर्राष्ट्रिय सहकार्य : संयुक्त राज्य अमेरिकाकी प्रथम महिला मेलानिया ट्रम्पसँगको सहकार्य तथा यसअघि कतारसँग भएको सहकार्यको विवरण समेटेर अन्तर्राष्ट्रिय सहयोगसम्बन्धी अध्यायलाई विस्तार गरिएको छ।

सञ्चालन सिद्धान्त र सहयोगका उदाहरण : आयोगको कार्यशैली र परिवारलाई दिइएको सहयोगका ठोस उदाहरणहरू अद्यावधिक गरिएको छ।

गलत सूचनाको खण्डन : बाल संरक्षणको विषयमा फैलाइएका भ्रामक सूचनाहरूको खण्डनसम्बन्धी अध्यायलाई थप सामग्रीसहित परिमार्जन गरिएको छ।

प्रतिवेदनको परिशिष्टमा रुस, युक्रेन र अन्य देशमा बालबालिका आफ्ना प्रियजनसँग पुनर्मिलन भएका कथाहरू समावेश गरिएका छन्।

रूसी राष्ट्रपतिका विदेशी मुलुकसँग लगानी तथा आर्थिक सहयोगसम्बन्धी विशेष प्रतिनिधि किरिल दिमित्रिभको सहयोगमा अमेरिकी पक्षसँग स्थापित सञ्चार माध्यमले द्वन्द्व प्रभावित परिवारलाई सहयोग जारी राख्न र अन्तर्राष्ट्रिय समुदायसमक्ष वास्तविक अवस्थाबारे जानकारी पुर्याउन सम्भव बनाउने अपेक्षा आयोगले गरेको छ।

यो बुलेटिनको पहिलो अंक सन् २०२३ को अप्रिलमा प्रकाशित भएको थियो। बालबालिका र परिवारलाई दिइने सहयोगबारे रुसी तथा विदेशी पत्रकारहरूले पटक–पटक गरेको जिज्ञासापछि यस्तो प्रतिवेदन तयार गर्ने निर्णय गरिएको थियो। आयोगले काम निरन्तर जारी रहने जनाएको छ।