चीन–फ्रान्स वार्ता : सुरक्षा परिषदका दुई स्थायी सदस्यले विश्व शान्तिको जिम्मेवारी सम्झिए
बेइजिङ । चीनका शीर्ष कूटनीतिज्ञ वाङ यीले चीन र फ्रान्स संयुक्त राष्ट्र सुरक्षा परिषदका स्थायी सदस्य तथा प्रमुख स्वतन्त्र राष्ट्रका रूपमा अन्तर्राष्ट्रिय शान्ति, स्थिरता र विकासको रक्षा गर्ने महत्वपूर्ण जिम्मेवारी बोकेको बताएका छन्।
फ्रान्सेली राष्ट्रपतिका कूटनीतिक सल्लाहकार इमानुएल बोनसँग बेइजिङमा भएको वार्ताका क्रममा वाङले यो धारणा राखेका हुन्। दुवै पक्षले चीन–फ्रान्स रणनीतिक संवादको २६ औं संस्करण सम्पन्न गर्दै द्विपक्षीय सहकार्यका उपलब्धिहरूको प्रशंसा गरे भने भावी योजनाहरूको खाका पनि कोरे।
वाङले बेइजिङ ‘चीन–फ्रान्स भावना’ कायम राख्दै पारस्परिक लाभका लागि पेरिससँग सहकार्य गर्न इच्छुक रहेको जोड दिए। उनले दुवै राष्ट्रले आफ्ना नेताहरूबीच भएको सहमतिलाई रणनीतिक र दीर्घकालीन दृष्टिकोणबाट हेर्नुपर्नेमा जोड दिए।
परमाणु ऊर्जा र अन्तरिक्षजस्ता परम्परागत क्षेत्रमा सहकार्यलाई गहिरो बनाउनुका साथै कृत्रिम बुद्धिमत्ता र हरित विकासजस्ता नयाँ क्षेत्रमा पनि अवसर खोल्न उनले आह्वान गरे।
बोनले फ्रान्सले चीनसँगको परम्परागत मित्रता र दुई राष्ट्र प्रमुखबीचको पारस्परिक विश्वासलाई महत्व दिने बताउँदै एक–चीन नीतिप्रति निरन्तर प्रतिबद्धता व्यक्त गरे।
दुवै पक्षले युक्रेन सङ्कट, इरानी आणविक मुद्दा र मध्यपूर्वको अवस्थाबारे पनि विचार आदानप्रदान गरे। आगामी वर्ष संयुक्त राष्ट्र सङ्घको ८० औं वार्षिकोत्सव पर्दै गर्दा दुवै पक्षले बहुपक्षीयताप्रति आफ्नो प्रतिबद्धता दोहोर्याए। वाङले संयुक्त राष्ट्र सङ्घ केन्द्रित अन्तर्राष्ट्रिय प्रणालीप्रति अटल समर्थनको आवश्यकता औंल्याए। बोनले गुटगत टकरावप्रति फ्रान्सको अस्वीकार रहेको बताउँदै स्वतन्त्र कूटनीतिको परम्परामा अडिग रहने प्रतिबद्धता व्यक्त गरे।
