मस्कोमा राष्ट्रपति पुटिन र मलेसियाका सर्वोच्च शासकबीच भेट, द्विपक्षीय सम्बन्ध सुदृढ गर्ने सहमति
मस्को । रुसका राष्ट्रपति भ्लादिमिर पुटिनले मलेसियाका सर्वोच्च शासक सुल्तान इब्राहिमसँग भेटवार्ता गरेका छन् । सुल्तान इब्राहिम महान् देशभक्तिपूर्ण युद्धको ८१औं विजय दिवस समारोहमा सहभागी हुन मस्को आएका हुन् ।
भेटका क्रममा राष्ट्रपति पुटिनले सुल्तान इब्राहिमलाई मस्कोमा स्वागत गर्दै गत भेट सेन्ट पिटर्सबर्गमा भएको स्मरण गराए । रुसको अति प्रिय दिन मानिने विजय दिवसमा सहभागी हुन समय निकालेकोमा उनले आभार व्यक्त गरे । ‘यस दिन हामी नाजीवादविरुद्धको सङ्घर्षमा हाम्रो देश र सम्पूर्ण मानवताले गरेको बलिदानको स्मरण गर्छौं,’ पुटिनले भने ।
राष्ट्रपति पुटिनले दुई देशबीचको सम्बन्ध राम्रोसँग अघि बढिरहेको उल्लेख गर्दै आगामी वर्ष कूटनीतिक सम्बन्धको वार्षिकोत्सव मनाइने बताए । व्यापार र आर्थिक सम्बन्ध विकास भइरहेको तर मात्रामा केही गिरावट आएको उल्लेख गर्दै उनले चाँडै यो प्रवृत्ति उल्टाउन सकिने विश्वास व्यक्त गरे ।
दुई देशबीच संयुक्त राष्ट्रसङ्घ, आसियान र इस्लामिक सहयोग सङ्गठनलगायत अन्तर्राष्ट्रिय मञ्चहरूमा सक्रिय सहकार्य रहेको पुटिनले बताए । गत वर्ष मलेसियाले आसियानको अध्यक्षता गरेको र सङ्गठनको ३५औं वार्षिकोत्सव मनाइरहेको सन्दर्भमा काजानमा संयुक्त कदमबारे सहमति भएको उनले जानकारी दिए । पुटिनले अन्तरसरकारी स्तरमा निकट सम्बन्ध भविष्यमा पनि कायम रहने विश्वास व्यक्त गरे ।
