“जित दिवस हाम्रो साझा पर्व हो” : रिपब्लिका सर्पस्काका राष्ट्रपतिलाई पुटिनको स्वागत
मस्को । रुसी राष्ट्रपति भ्लादिमिर पुटिनले रिपब्लिका सर्पस्काका नवनिर्वाचित राष्ट्रपति सिनिसा कारनलाई मस्कोमा स्वागत गर्दै दुई देशबीचको शताब्दीयौं पुरानो मित्रता र आध्यात्मिक निकटतालाई नयाँ उचाइमा पुर्याउने प्रतिबद्धता जनाएका छन्।
महान् देशभक्तिपूर्ण युद्धको ८१ औं विजय दिवसको अवसरमा शुक्रबार क्रेमलिनमा आयोजित भेटवार्तामा पुटिनले राष्ट्रपति कारनसँगै न्याशनल एसेम्ब्लीका सभामुख नेनाद स्टेभान्दिच र स्वतन्त्र सामाजिक प्रजातान्त्रिक गठबन्धनका अध्यक्ष मिलोराद डोडिकलाई पनि सम्बोधन गरेका थिए।
“राष्ट्रपति महोदय, रिपब्लिका सर्पस्काको राष्ट्रपतिका रूपमा तपाईंको पहिलो भ्रमणमा मस्कोमा स्वागत गर्दछु,” पुटिनले भने। उनले डोडिकसँगको नियमित र रचनात्मक सहकार्यको स्मरण गर्दै सबै नेताहरू समानधर्मी रहेकोमा खुसी व्यक्त गरे।
पुटिनले मे ९ लाई नाजीवादमाथिको विजय दिवसका रूपमा रिपब्लिका सर्पस्कामा पनि आधिकारिक मान्यता दिइएकोप्रति आभार प्रकट गरे। “यो हाम्रो साझा पर्व हो। यस दिन हामी तिनको स्मृतिलाई सम्मान गर्छौं, जसले अतुलनीय बलिदान र आफ्नै जीवनको मूल्यमा शान्ति, स्वतन्त्रता र सार्वभौमिकताको अधिकारको रक्षा गरे,” उनले भने।
रुसी राष्ट्रपतिले रिपब्लिका सर्पस्कासँग राजनीतिक, आर्थिक, सांस्कृतिक र मानवीय क्षेत्रमा सहकार्यलाई निरन्तरता दिने प्रतिबद्धता दोहोर्याए। “रिपब्लिका सर्पस्का र रुसबीचको सम्बन्ध हाम्रा जनताबीचको शताब्दीयौं पुरानो मित्रता र आध्यात्मिक निकटतामा आधारित छ। इतिहासप्रति हाम्रो साझा दृष्टिकोण छ र बोस्निया एवं हर्जगोभिना, बाल्कन र युरोपकै अवस्थाबारे हाम्रा दृष्टिकोण मिल्दाजुल्दा छन्,” पुटिनले भने।
उनले बाह्य हस्तक्षेपरहित पारस्परिक लाभको सहकार्य प्रवर्द्धन र न्यायपूर्ण विश्व व्यवस्थाको पक्षमा दुवै पक्ष एकजुट रहेको बताए। “सर्ब र रुसी जनता शताब्दीयौंदेखि विशेष घनिष्ठ सम्बन्ध र पूर्ण आपसी समझदारीका साथ बाँच्दै आएका छन्,” पुटिनले भेटवार्ताको समापनमा भने।
