पूर्वप्रधानमन्त्री थाक्सिन प्यारोलमा रिहा, कारागारबाहिर समर्थकको भीड

बैंकक । थाइल्यान्डका पूर्वप्रधानमन्त्री थाक्सिन सिनावात्रा एक वर्षको जेल सजायको बाँकी चार महिना प्यारोलमा पूरा गर्न अनुमति पाएपछि सोमबार बैंककको क्लङ प्रेम केन्द्रीय कारागारबाट रिहा भएका छन्।

स्थानीय समय अनुसार बिहान करिब ७:४० बजे कारागारबाहिर परिवारका सदस्यसँग पुनर्मिलन गर्दै थाक्सिन सार्वजनिक रूपमा देखा परेका थिए। मानक प्यारोल मापदण्ड अनुसार आवश्यक दुई तिहाइ सजाय उनले कारागारमै बिताएका थिए। उनले परिवारसहित थाई झण्डाप्रति सम्मान अर्पण गरेका थिए भने समर्थकहरूप्रति आभार व्यक्त गरेका थिए। त्यसपछि स्थानीय समय अनुसार बिहान करिब ७:५५ बजे उनी गाडीमा त्यहाँबाट प्रस्थान गरे।

कारागार परिसरबाहिर रातो पोसाकमा सज्जिएका समर्थकहरूको भीडले कडा प्रहरी सुरक्षाबीच पूर्वप्रधानमन्त्रीलाई स्वागत गरेको थियो। थाक्सिन बैंककस्थित परिवीक्षण कार्यालयमा रिपोर्टिङका लागि प्रस्थान गरेका थिए।

सुधार विभागका अनुसार थाक्सिन गत महिना बसेको प्यारोल समितिको बैठकमा प्रारम्भिक रिहाइ पाउने ८५० भन्दा बढी कैदीमध्येमा परेका थिए। उनको उमेर ७० वर्षभन्दा माथि र एक वर्षभन्दा कम जेल समय बाँकी रहेको आधारमा प्यारोलको योग्यता निर्धारण गरिएको थियो। सुधार विभागले उनले विद्युतीय अनुगमन उपकरण लगाउनुपर्ने, प्यारोल सुपरिवेक्षण स्वीकार गर्नुपर्ने, नियामक निकायमा समयमै रिपोर्टिङ गर्नुपर्ने र एक वर्षे सजाय औपचारिक रूपमा सेप्टेम्बर ९ मा समाप्त नभएसम्म देशबाहिर जान नपाउनेलगायत कडा परिवीक्षण सर्त पालना गर्नुपर्ने बताएको छ।

थाइल्यान्डको न्याय मन्त्रालयअन्तर्गतको प्यारोल समितिले अप्रिल २९ मा बैठक बसी थाक्सिनलाई मे ११ मा प्यारोलमा रिहा गर्ने निर्णय गरेको थियो।

हाल ७६ वर्षीय थाक्सिनले सन् २००१ र २००५ मा निर्वाचन जित्दै दुई पटक दक्षिणपूर्वी एसियाली मुलुक थाइल्यान्डको प्रधानमन्त्रीका रूपमा सेवा गरेका थिए। सन् २००६ को सैन्य विद्रोहले उनको दोस्रो कार्यकाल छोट्याइदिएको थियो र सन् २००८ मा उनी स्वनिर्वासनमा गएका थिए।

सन् २०२३ अगस्टमा थाइल्यान्ड फर्केपछि उनलाई कार्यकालका क्रममा लागेका तीन अभियोगमा आठ वर्षको जेल सजाय सुनाइएको थियो। एक दिन पनि जेलमा नबिताई गम्भीर स्वास्थ्य समस्याका कारण उनलाई बैंककस्थित प्रहरी अस्पतालमा सारिएको थियो। पछि शाही माफीको अनुरोधपछि उनको सजाय एक वर्षमा झारिएको थियो।

तर, सर्वोच्च अदालतले उनको ६ महिनाको अस्पताल बसाइ कानुनी रूपमा मान्य नभएको र त्यसलाई सजायको अवधिमा गणना गर्न नसकिने फैसला गरेपछि थाक्सिन सन् २०२५ सेप्टेम्बर ९ मा पुनः कारागार फर्केका थिए।

पूर्वप्रधानमन्त्री थाक्सिन अझै पनि राजतन्त्रविरुद्धको मानहानी मुद्दामा फसेका छन्। सन् २०१५ मा विदेशी सञ्चारमाध्यमसँगको अन्तर्वार्तामा दिएको अभिव्यक्तिलाई लिएर तल्लो अदालतले सफाइ दिएकोमा महान्यायाधिवक्ताले पुनरावेदन गरेसँगै यो मुद्दा विचाराधीन छ।