‘देवभूमि नेपाल’ अभियानसहित पर्यटनमा सरकारको महत्वाकांक्षी योजना, सन् २०८५ मा ‘भिजिट नेपाल’

काठमाडौं । सरकारले आगामी आर्थिक वर्ष २०८३/८४ को नीति तथा कार्यक्रममार्फत नेपाललाई विश्व आध्यात्मिक पर्यटन केन्द्रका रूपमा स्थापित गर्न ‘देवभूमि नेपाल’ राष्ट्रिय अभियान सञ्चालन गर्ने घोषणा गरेको छ। राष्ट्रपति रामचन्द्र पौडेलले सोमबार सङ्घीय संसद्को संयुक्त बैठकमा नीति तथा कार्यक्रम प्रस्तुत गर्दै धार्मिक, सांस्कृतिक, आरोग्य, चलचित्र र साहसिक पर्यटनलाई विशेष प्राथमिकतामा राखिएको बताए।

सरकारले हवाई सेवालाई भरपर्दो बनाउन पूर्वाधार विस्तार र अन्तर्राष्ट्रिय विमानस्थलको पूर्ण सञ्चालनलाई प्राथमिकतामा राखेको छ। नीति तथा कार्यक्रममा नागरिक उड्डयन क्षेत्रमा संरचनात्मक सुधार गर्दै निजी क्षेत्रको सहभागिता बढाउने र अन्तर्राष्ट्रिय सुरक्षा मापदण्ड कडाइका साथ पालना गर्ने लक्ष्य राखिएको छ। भैरहवास्थित गौतमबुद्ध र पोखरा अन्तर्राष्ट्रिय विमानस्थलमा थप अन्तर्राष्ट्रिय वायुसेवा प्रदायकलाई आकर्षित गर्न कूटनीतिक पहल गरिने उल्लेख छ।

पर्यटन सेवालाई सहज बनाउन पर्यटक भिसा सेवा पूर्ण रूपमा अनलाइन प्रणालीमा आबद्ध गरिने र अध्यागमन विन्दुबाटै पर्यटकीय अनुमति तथा सेवाहरू एकीकृत रूपमा उपलब्ध गराउन ‘एकद्वार डिजिटल पर्यटन प्रणाली’ लागू गरिने नीति तथा कार्यक्रममा जनाइएको छ।

सरकारले विसं २०८५ लाई ‘भिजिट नेपाल’ वर्षका रूपमा मनाउने तयारी गर्दै पर्यटकको आगमन, खर्च र बसाइँ अवधि बढाउने महत्वाकांक्षी लक्ष्य लिएको छ। साहसिक पर्यटनका लागि प्याराग्लाइडिङ, बन्जीजम्प र स्काई डाइभिङलगायत गतिविधिमार्फत पर्यटन प्रवर्द्धन गरिने भएको छ। हिमाली, मध्यपहाडी र तराई क्षेत्रमा कम्तीमा १० वटा नयाँ पदमार्ग पहिचान गरी सञ्चालनमा ल्याइने छ।

पर्वतीय पर्यटनको सुरक्षाका लागि खोज तथा उद्धार प्रणालीलाई आधुनिक प्रविधिसँग जोडिने सरकारको योजना छ। नेपाल पर्यटन बोर्डलाई सार्वजनिक–निजी साझेदारी ढाँचामा पुनर्संरचना गरी थप नवप्रवर्तनशील बनाउने योजना पनि अघि सारिएको छ। कर्णाली, सुदूरपश्चिम, मधेस र कोशी प्रदेशका नयाँ पर्यटकीय गन्तव्यलाई विशेष प्राथमिकता दिँदै पर्यटन इकोसिस्टमको विकास गरिने नीतिमा उल्लेख छ।