चीनले सार्वजनिक गर्याे २०२६ को विधायिकी प्राथमिकता, सडक सुरक्षादेखि शिक्षक कानुनसम्म संशोधनको तयारी
बेइजिङ । चीनले सन् २०२६ का लागि आफ्नो विधायिकी प्राथमिकता सार्वजनिक गरेको छ । राष्ट्रिय जन कांग्रेस (एनपीसी) स्थायी समिति र राज्य परिषद्को वार्षिक विधायिकी योजना सोमबार सार्वजनिक गरिएको हो ।
एनपीसी स्थायी समितिको वार्षिक विधायिकी कार्यसूची अनुसार जनताको जीवनस्तरसँग जोडिएका कानुनी संरचना सुदृढ गर्ने उद्देश्यका साथ सडक यातायात सुरक्षा कानुन र शिक्षक कानुनमा संशोधन अघि बढाइनेछ । साथै, सामाजिक सहायता, स्वास्थ्य सुरक्षा र बाल हेरचाह सेवासम्बन्धी नयाँ कानुनको मस्यौदा पनि तयार गरिने भएको छ ।
उक्त कार्यसूचीमा राष्ट्रिय सम्पत्ति, वित्त, अभियोजनसम्बन्धी सार्वजनिक हित मुद्दा र सीमापार भ्रष्टाचार नियन्त्रणसम्बन्धी कानुनको मस्यौदा तयार गर्ने विषय पनि समावेश छ ।
यसैगरी, राज्य परिषद्को वार्षिक विधायिकी योजनामा एकीकृत राष्ट्रिय बजार विकास, न्यायिक कार्यालय सञ्चालन तथा उत्पादन सुरक्षा जोखिमको अनुसन्धान र सुधारसम्बन्धी नियमावली तर्जुमा गर्ने उल्लेख छ ।
