सल्यानमा असिना र बाढीको विनाशकारी प्रकोप, सांसद मल्लद्वारा संसद्मा सरकारको ध्यानाकर्षण
काठमाडौं । सल्यानबाट प्रतिनिधित्व गर्ने सांसद रमेश मल्लले लगातार तीन पटकको विनाशकारी असिना र वर्षासहितको जलवायुजन्य प्रकोपले जिल्लाको व्यावसायिक कृषितर्फ आकर्षित हुँदै गएको जनतालाई गम्भीर आघात पुर्याएको भन्दै संसद्मा सरकारको ध्यानाकर्षण गराएका छन्।
सभामुखलाई सम्बोधन गर्दै सांसद मल्लले गत शनिबार मुख्यतः बागचौर नगरपालिका, छत्रेश्वरी र कपुरकोट गाउँपालिकालगायत क्षेत्रमा परेको असिनापानी र त्यसपछि शारदा नदीमा आएको बाढीले सयौं रोपनी खेत पुरिएको, पाकेको गहुँ, तरकारी तथा सुन्तला, आँप, लिची, ओखर, टिमुर, किवी, स्याउलगायत फलफूलबाली नष्ट भएको बताए। ग्रामीण सडक, सिँचाइ कुलो, खानेपानी योजना र तटबन्ध संरचना क्षतविक्षत हुँदा जनजीवन कष्टकर बनेको उनको भनाइ छ।
सांसद मल्लले तत्कालका लागि तीनै तहका सरकारको समन्वयमा पीडित किसान र क्षतिग्रस्त संरचनाको यथार्थ लगत सङ्कलन गरी राहत, क्षतिपूर्ति तथा पुनर्स्थापनाको व्यवस्था गर्न र कृषि बीमा कार्यक्रमलाई प्रभावकारी बनाउन सभामुखमार्फत सरकारको गम्भीर ध्यानाकर्षण गराए।
एकातिर बँदेल, बाँदरलगायत जङ्गली जनावरको अतिक्रमण, अर्कोतिर अतिवृष्टि र अनावृष्टिको मारले किसानमा आशा हराउँदै गएको उल्लेख गर्दै सांसद मल्लले यसमा सरकार बेखबरझैं बन्नुले राज्यप्रतिको भरोसासमेत कमजोर बनेको बताए। उनले सरकार अभिभावक बनेर पीडितको घाउमा मल्हम लगाउनुपर्ने माग गरे।
