होर्मुज सुरक्षाका लागि अस्ट्रेलियाको सैन्य तयारी, बेलायत–फ्रान्स नेतृत्वको मिसनमा निगरानी विमान पठाउने
क्यानबेरा । मध्यपूर्वमा जारी तनावका बीच होर्मुज जलडमरूमध्य हुँदै हुने जलयातायातलाई सुरक्षित बनाउन अस्ट्रेलियाले बेलायत र फ्रान्सको नेतृत्वमा गठन हुने बहुराष्ट्रिय सैन्य मिसनमा सहयोग गर्न तयार रहेको जनाएको छ। एक वरिष्ठ अधिकारीले बुधबार यो जानकारी दिए।
रक्षामन्त्री रिचर्ड मार्लेसले एक वक्तव्यमा भने, “मिसन स्थापना भएपछि अस्ट्रेलियाले त्यसमा ई–७ए वेजटेल निगरानी विमान योगदान गर्नेछ।” उनले ४० भन्दा बढी देशका रक्षामन्त्रीहरूसँगको बैठकपछि यो घोषणा गरेका हुन्। बैठकमा सहभागीहरूले रणनीतिक जलमार्गमा नौवहन स्वतन्त्रताप्रति प्रतिबद्धता दोहोर्याएका थिए।
मार्लेसले भने, “यो बहुराष्ट्रिय सैन्य मिसन जारी कूटनीतिक प्रयास र तनाव कम गर्ने पहलको परिपूरकका रूपमा डिजाइन गरिएको छ। यसले अन्तर्राष्ट्रिय व्यापारको सुरक्षाप्रति ठोस प्रतिबद्धता पनि प्रदर्शन गर्दछ।” उनले चेतावनी दिँदै भने, “यो द्वन्द्व जति लामो हुँदै जान्छ, अस्ट्रेलियामा त्यसको प्रभाव त्यति नै गम्भीर हुँदै जानेछ।” सरकारले यी प्रयासहरूलाई सहयोग गर्न साझेदारहरूसँग काम जारी राख्ने उनले बताए।
