स्मार्ट टेलिकम प्रकरण : मेगा बैंकका सीईओ पाण्डे पक्राउ, भाग्दै गरेको अवस्थामा सिन्धुलीबाट समातिए
सिन्धुली/काठमाडौं । नेपाल इन्भेष्टमेन्ट मेगा बैंक लिमिटेडका प्रमुख कार्यकारी अधिकृत (सीईओ) ज्योतिप्रकाश पाण्डे पक्राउ परेका छन्। सिन्धुलीको कमलामाई नगरपालिका–६ स्थित बसपार्क क्षेत्रमा सवारी जाँचका क्रममा मंगलबार राति करिब ८ बजे उनलाई पक्राउ गरिएको प्रहरीले जनाएको छ। मोबाइल फोन स्विच अफ गरी भाग्दै गरेको अवस्थामा उनी फेला परेका थिए।
प्रहरीका अनुसार पाण्डेमाथि नेपाल सरकारको सम्पत्तिमा बेइमानीपूर्वक हक समाप्त गर्ने उद्देश्यले लिलामी प्रक्रियामा अनियमितता गरेको आरोप लागेको छ। उनी लोन रिकभरी कमिटी (एलआरसी) का अध्यक्षसमेत हुन्।
यो प्रकरण स्मार्ट टेलिकम प्रालिसँग जोडिएको छ। नेपाल दूरसञ्चार प्राधिकरणबाट २०७० वैशाख २ गते आधारभूत टेलिफोन सेवाको अनुमतिपत्र लिई सञ्चालनमा आएको स्मार्ट टेलिकम प्रालिले नियमानुसार अनुमतिपत्र नवीकरण नगरेपछि दूरसञ्चार ऐन, २०५३ को दफा २५(५) अनुसार २०८० वैशाख ३ गतेदेखि अनुमतिपत्र स्वतः रद्द भएको थियो। त्यसपछि दूरसञ्चार सेवा प्रदायकको सम्पत्ति व्यवस्थापन नियमावली, २०७९ अनुसार कम्पनीका सम्पूर्ण सम्पत्ति, पूर्वाधार तथा दूरसञ्चार सञ्जाल नेपाल दूरसञ्चार प्राधिकरणले नियन्त्रणमा लिएको थियो।
प्रहरीका अनुसार नेपाल इन्भेष्टमेन्ट मेगा बैंकले २०८२ असोज ३ गते प्रकाशित लिलामी सूचनामा स्मार्टसेलले घरधनीलाई तिर्न बाँकी घरभाडा र विद्युत् महसुलबापत करिब ४० करोड रुपैयाँसमेत बोलपत्र रकममा समावेश गरी कबोल गर्नुपर्ने उल्लेख गरेको थियो। तर, उक्त रकम बैंकले लिएर पनि हालसम्म घरधनीलाई घरभाडा तथा विद्युत् महसुल नतिरेको आरोप पनि अनुसन्धानको विषय बनेको छ।
