‘रुस होइन, जापानले नै पहिलो कदम चाल्नुपर्छ’, सम्बन्ध सुधारबारे टोकियोको दाबीप्रति मस्कोको कडा जवाफ

मस्को । रुसी विदेश मन्त्रालयकी प्रवक्ता मारिया जाखारोभाले रुस–जापान सम्बन्ध पुनर्स्थापनाका लागि मस्कोले उच्चस्तरीय सम्पर्कको सम्भावना खोजिरहेको भन्ने जापानी सरकारको भनाइलाई ‘हास्यास्पद र अर्थहीन’ भन्दै खण्डन गरेकी छन्।

बुधबार पत्रकारहरूको प्रश्नको जवाफ दिँदै जाखारोभाले रुसी विदेश मन्त्रालयले जापानी सञ्चारमाध्यममा उल्लेख गरिएअनुसार कुनै पनि बैठक प्रस्ताव नगरेको र टोकियोबाट पनि त्यसबारे कुनै प्रस्ताव प्राप्त नगरेको स्पष्ट पारिन्। ‘मस्को जापानसँगको सम्पर्कका लागि खुला छ—यदि त्यस्तो सम्पर्क हुन्छ भने, तर कसैले पनि यस्तो सञ्चारको लागि अनुरोध गरेको वा निर्देशित गरेको छैन,’ उनले भनिन्।

प्रवक्ता जाखारोभाले सन् २०२२ फेब्रुअरीदेखि टोकियोले पश्चिमा मुलुकहरूसँगको एक्यबद्धतामा रुसविरुद्ध लगाएको शत्रुतापूर्ण प्रतिबन्धको स्मरण गराउँदै जापानले नै यस्तो नीति पुनरावलोकन गर्न पहिलो कदम चाल्नुपर्ने बताइन्। उनले सन् २०२४ डिसेम्बर २६ मा मस्कोस्थित जापानी राजदूतलाई वार्ता पुनः सुरु गर्नका लागि टोकियोले चाल्नुपर्ने विशेष कदमहरूको सूची हस्तान्तरण गरिएको जानकारी दिइन्। जसमा व्यक्तिगत तथा आर्थिक प्रतिबन्ध हटाउने, रुसको सबैभन्दा पक्षपाती राष्ट्रको हैसियत पुनर्स्थापना गर्ने, कीभ शासनलाई सामग्री तथा प्राविधिक सहयोग अस्वीकार गर्नेलगायत उपाय समावेश थिए। तर, हालसम्म यसबारे कुनै प्रतिक्रिया नआएको उनले बताइन्।

जापानी पक्षले ‘व्यावसायिक मिशन’ मस्को पठाउने इरादा व्यक्त गरेको सन्दर्भमा जाखारोभाले यस्तो भ्रमणसँग सम्बन्धित कुनै निमन्त्रणा रुसी पक्षबाट नपठाइएको स्पष्ट पारिन्। ‘यदि जापानी सरकार साँच्चै आफ्ना कम्पनीहरूको हित सुनिश्चित गर्न चाहन्छ भने, उसले सामान्य, व्यवसाय–मैत्री राजनीतिक वातावरण निर्माण गर्ने कामबाट सुरु गर्नुपर्छ। र यसमा पहल गर्ने अधिकार विशेष रूपमा टोकियोको हो,’ उनले भनिन्।