‘पूर्वको स्वर्ग’ बाट ‘सुनौलो, समृद्ध र समर्थ सिक्किम’ तर्फ : ५१औं राज्य दिवसमा मुख्यमन्त्रीको सन्देश

गान्तोक । सिक्किमले आफ्नो ५१औं राज्य दिवस मनाइरहँदा मुख्यमन्त्री प्रेमसिंह तामाङ (गोले) ले स्वदेश तथा विदेशमा रहेका सम्पूर्ण सिक्किमवासीलाई हार्दिक शुभकामना दिएका छन्। उनले प्रधानमन्त्री नरेन्द्र मोदीको हालैको भ्रमणले सिक्किमको पाँच दशकको यात्रालाई राष्ट्रिय मान्यता दिएको बताए।

मुख्यमन्त्रीले भने, “प्रधानमन्त्रीजीले सिक्किमलाई ‘पूर्वको स्वर्ग’ भन्दै दिगो विकास, वातावरण संरक्षण, जैविक खेती, सरसफाइ र शान्तिपूर्ण सहअस्तित्वको नमुनाका रूपमा प्रशंसा गर्नुभयो।” प्रधानमन्त्री मोदीको भ्रमणका क्रममा चार हजार करोड रुपैयाँभन्दा बढीका विकास परियोजनाहरूको उद्घाटन र शिलान्यास भएको थियो। यसका साथै, मोदीले युवा फुटबल खेलाडीहरूसँग गरेको संक्षिप्त खेलले सिक्किमको युवा शक्तिको असीमित सम्भावनालाई प्रतिबिम्बित गरेको उनले स्मरण गरे।

मुख्यमन्त्रीले राज्यको विकास यात्रालाई ‘विस्तारबाट उत्कृष्टता’ तर्फको बाटोका रूपमा परिभाषित गरे। उनले भने, “अबको हाम्रो जिम्मेवारी पहुँचबाट गुणस्तर र निर्माणबाट दीर्घकालीन मर्मतसम्भार, दिगोपन र नवप्रवर्तनतर्फ जानु हो।” उनले ‘विकसित भारत २०४७’ को परिकल्पनामा सिक्किमको भूमिकालाई सशक्त बनाउन शिक्षा, सीप विकास, उद्यमशीलता, खेलकुद र स्वास्थ्य क्षेत्रमा भएका प्रगतिहरूको विस्तृत विवरण प्रस्तुत गरे।

शिक्षा क्षेत्रमा सिक्किम सबै सरकारी विद्यालयमा किन्डरगार्टन प्रणाली लागू गर्ने पहिलो राज्य बनेको छ। ‘मिसन लक्ष्य’ मार्फत राज्यभित्रै आईआईटी–जेईई र नीटको तयारी गराइन्छ भने ‘नरबहादुर भण्डारी फेलोसिप’ ले अन्तर्राष्ट्रिय विश्वविद्यालयमा स्नातकोत्तर अध्ययनका लागि ५० लाख रुपैयाँसम्मको आर्थिक सहायता प्रदान गर्छ। खेलकुदमा पाल्जोर स्टेडियमस्थित राज्य खेलकुद प्रतिष्ठानको पुनर्जीवन, तरुणदीप राई आर्चरी प्रतिष्ठान र जसलाल प्रधानको नाममा बक्सिङ प्रतिष्ठान स्थापनाको प्रस्तावले सिक्किमलाई उच्च खेलकुद केन्द्रका रूपमा विकास गर्ने लक्ष्य राखिएको छ।

स्वास्थ्यमा एसटीएनएम अस्पतालमा राज्यकै पहिलो क्यान्सर उपचार केन्द्र, स्त्री रोग ओन्कोलोजी, हृदय उपचारमा इलेक्ट्रोफिजियोलोजी र रेडियोफ्रिक्वेन्सी एब्लेसनजस्ता अत्याधुनिक सेवा सञ्चालनमा आएका छन्। आयुष क्षेत्रमा सोवा रिग्पा, आयुर्वेद, योग र प्राकृतिक चिकित्साको सम्मिश्रण गर्दै सिक्किमले समग्र स्वास्थ्य मोडेल अघि बढाएको छ। मुख्यमन्त्री वात्सल्य योजनाले ८१६ महिलालाई आईभीएफ उपचारका लागि आर्थिक सहयोग गरेको छ।

पर्यटनमा भालेढुङ्गा, याङगाङ र पेलिङमा यात्रु रोपवे सञ्चालन, भालेढुङ्गामा स्काइवाक र सिंगशोरमा ग्लास ब्रिज निर्माणले सिक्किमलाई उच्च मूल्यको पर्यटकीय गन्तव्य बनाउने लक्ष्य राखिएको छ। ‘मेगा होमस्टे योजना’ मार्फत एक हजार होमस्टे स्थापनाको लक्ष्यले ग्रामीण अर्थतन्त्रलाई बल दिने अपेक्षा गरिएको छ। सिक्किमको पर्यटक आगमन सन् २०२५ मा १७.२ लाख पुगेको छ।

कृषिमा सन् २०१६ मा भारतकै पहिलो पूर्ण जैविक राज्य घोषित सिक्किमले ७६ हजार हेक्टरभन्दा बढी भूमिमा रसायनरहित खेती गरिरहेको छ। ‘मेरो अलैंची, मेरो धान’ अभियानले जलवायु अनुकूल कृषिलाई प्रवर्द्धन गरेको छ। सिक्किमले भारतकै पहिलो हिमताल विस्फोट बाढी न्यूनीकरण योजना शाको छोको लागि तयार गरेको छ।

ग्रामीण विकासमा प्रधानमन्त्री ग्राम सडक योजनाले ४६०० किलोमिटरभन्दा बढी सडक निर्माण गरेको छ भने सिक्किम गरिब आवास योजनाले ७०५० घर निर्माण सम्पन्न गरेको छ। राज्य ग्रामीण आजीविका मिसनले ५८६९ स्वसहायता समूह गठन गरी १४७१९ महिलालाई ‘लखपति दिदी’ बनाएको छ। स्वच्छ भारत मिसनमा सिक्किम सन् २०२३ मा भारतकै पहिलो ओडीएफ प्लस मोडेल राज्य घोषित भएको छ।

उद्यमशीलतामा दर्ता भएका सूक्ष्म, साना तथा मझौला उद्यम (एमएसएमई) को सङ्ख्या सन् २०१९ को २५० बाट बढेर सन् २०२६ मा ३५ हजार नाघेको छ। मुख्यमन्त्री युवा उद्यमशीलता विकास योजनाले ‘एक परिवार, एक उद्यमी’ को परिकल्पनासहित पाँच लाख रुपैयाँसम्म बीउ पुँजी प्रदान गर्छ। सिक्किमलाई डीपीआईआईटीको स्टार्टअप इकोसिस्टम रैंकिङ २०२६ मा ‘आकांक्षी नेता’ का रूपमा मान्यता दिइएको छ।

मुख्यमन्त्रीले नेपालसँगको सीमामा चेवा भञ्ज्याङमा बहुउद्देश्यीय व्यापार करिडोर स्थापना र नाथुला व्यापार मार्ग पुनः सञ्चालनको तयारीले क्षेत्रीय सम्पर्क र व्यापारमा सिक्किमको रणनीतिक महत्त्वलाई सुदृढ बनाउने विश्वास व्यक्त गरे।

अन्त्यमा, मुख्यमन्त्रीले भने, “आउनुहोस्, हामी सबै मिलेर ‘सुनौलो, समृद्ध र समर्थ सिक्किम’ को भावनाका साथ ‘विकसित भारत २०४७’ को परिकल्पनामा योगदान गरौं।”