नेपाल प्रहरीका १४९ डीएसपीको सरुवा
काठमाडौं । नेपाल प्रहरीमा ठूलो संख्यामा प्रहरी नायब उपरीक्षक डीएसपीहरूको सरुवा गरिएको छ। प्रहरी प्रधान कार्यालयले शुक्रबार एकैपटक १४९ जना डीएसपीलाई विभिन्न जिम्मेवारीमा खटाउने निर्णय गरेको हो।
प्रधान कार्यालयको मानवस्रोत विकास शाखाले सूचना जारी गर्दै विभिन्न जिल्ला प्रहरी कार्यालय, प्रहरी वृत्त, निर्देशनालय तथा अन्य इकाइमा कार्यरत डीएसपीहरूलाई नयाँ कार्यक्षेत्र तोकिएको जनाएको छ।
प्रहरी संगठनभित्र नियमित प्रशासनिक प्रक्रियाअन्तर्गत लामो समयदेखि एउटै कार्यक्षेत्रमा कार्यरत तथा कमाण्ड सम्हाल्दै आएका अधिकारीहरूको सरुवा गरिएको हो। कार्यक्षमता, आवश्यकता र संगठनात्मक व्यवस्थापनलाई आधार मानेर उनीहरूलाई नयाँ जिम्मेवारी दिइएको प्रधान कार्यालयले जनाएको छ।
यस सरुवासँगै काठमाडौं उपत्यकाका विभिन्न प्रहरी वृत्तसहित देशका प्रमुख जिल्लाका प्रहरी कार्यालयका कमाण्डरहरू पनि परिवर्तन भएका छन्। सरुवाले स्थानीय सुरक्षा व्यवस्थापन, अपराध नियन्त्रण, अनुसन्धान तथा सेवा प्रवाहमा नयाँ नेतृत्व आउने भएको छ।
प्रहरी प्रधान कार्यालयका अनुसार सरुवा भएका सबै डीएसपीहरूलाई तत्कालै हालको कार्यक्षेत्रबाट बरबुझारथ गरी नयाँ कार्यस्थलमा हाजिर हुन निर्देशन दिइएको छ।
नेपाल प्रहरीमा समय–समयमा हुने यस्ता सरुवालाई संगठनात्मक चुस्तता, कार्यदक्षता अभिवृद्धि र सुरक्षा व्यवस्थापनलाई प्रभावकारी बनाउने नियमित प्रक्रिया मानिन्छ।
