पुटिन र युएई राष्ट्रपतिबीच टेलिफोन वार्ता : मध्यपूर्व सङ्कट र इरानबारे छलफल
मस्को। रुसी राष्ट्रपति भ्लादिमिर पुटिन र संयुक्त अरब इमिरेट्सका राष्ट्रपति मोहम्मद बिन जायद अल नाहयानबीच शुक्रबार टेलिफोन वार्ता भएको छ।
क्रेमलिनले जारी गरेको विज्ञप्तिअनुसार दुई नेताबीच मध्यपूर्व क्षेत्र र इरान वरपरको सङ्कटपूर्ण अवस्थाबारे छलफल भएको थियो। दुवै पक्षले क्षेत्रीय मुलुकहरूको हितलाई ध्यानमा राख्दै सम्झौतामा आधारित शान्तिपूर्ण समाधान खोज्ने राजनीतिक तथा कूटनीतिक प्रक्रियालाई निरन्तरता दिनुपर्नेमा जोड दिए।
दुई मुलुकबीचको राजनीतिक, व्यापारिक तथा आर्थिक सहकार्य सफलतापूर्वक अघि बढिरहेकोमा दुवै नेताले पारस्परिक सन्तुष्टि व्यक्त गरे। उनीहरू सक्रिय द्विपक्षीय सम्पर्क कायम राख्न सहमत भएका छन्।
वार्ताका क्रममा राष्ट्रपति पुटिनले युक्रेन द्वन्द्वका सन्दर्भमा मानवीय सहायता उपलब्ध गराउन इमिरेट्सले पुर्याउँदै आएको नियमित सहयोगप्रति आभार प्रकट गरेका थिए।
