‘हाम्रा राम्रा कार्यक्रम अघि बढाएकामा धन्यवाद, तर…’ : पूर्वअर्थमन्त्री पुनको सरकारप्रति मिश्रित प्रतिक्रिया

काठमाडौं । नेपाली कम्युनिस्ट पार्टी (नेकपा) का नेता एवं पूर्वअर्थमन्त्री वर्षमान पुन अनन्तले पुष्पकमल दाहाल प्रचण्ड नेतृत्वको सरकारले आर्थिक वर्ष २०८१/८२ को बजेटमा समावेश गरेका महत्त्वपूर्ण कार्यक्रमहरू वर्तमान अर्थमन्त्री डा. स्वर्णिम वाग्लेले बजेटका सिद्धान्त र प्राथमिकतामा समावेश गरेको भन्दै सरकारलाई धन्यवाद दिएका छन्। तर, उनले सुशासनका नाममा सरकार छनोटपूर्ण व्यवहारमा उत्रिएको भन्दै आशंका पनि व्यक्त गरे।

सोमबार प्रतिनिधिसभा बैठकमा बजेटका सिद्धान्त र प्राथमिकतामाथिको छलफलमा भाग लिँदै पुनले रास्वपा समेत सहभागी प्रचण्ड सरकारले अघि सारेका सुशासन, आर्थिक सुधारको नयाँ चरण, अर्थतन्त्रको पुनर्संरचना, उत्पादन तथा रोजगारीमुखी अर्थतन्त्रको निर्माणजस्ता विषयहरू अहिले पनि सिद्धान्त र प्राथमिकतामा सही रूपमा आएको बताए। “सुशासनअन्तर्गत सार्वजनिक सेवा प्रवाहलाई सूचना प्रविधिसँग आबद्ध गरी क्यासलेस, पेपरलेस र फेसलेस बनाउने, उपलब्ध स्रोतसाधनको दक्षतापूर्वक विनियोजन गर्ने, खर्चलाई प्रभावकारी बनाउने, भ्रष्टाचार र चुहावट नियन्त्रण गर्ने जस्ता प्रचण्ड नेतृत्वको सरकारले अघि बढाएका विषयहरू अहिले सिद्धान्त र प्राथमिकतामा सही रूपमा आएका छन्,” उनले भने।

तर, पूर्वाधारको विकास नभएको र डिजिटल विभाजन उच्च रहेको अवस्थामा सुशासनको लाभांश सबै वर्ग र समुदायले समान रूपमा लिन नसक्ने भन्दै पुनले ई–गभर्नेन्सका लागि अनिवार्य पूर्वाधार निर्माण र डिजिटल प्रक्रिया सबैको पहुँचमा पुर्याउने विषय प्राथमिकतामा पर्नुपर्ने बताए।

पूर्वअर्थमन्त्री पुनले सरकारले स्वतन्त्र र अधिकारसम्पन्न सम्पत्ति छानबिन आयोग गठन गर्नुपर्नेमा कार्यकारी प्रमुखकै मातहतमा राखेकोमा आपत्ति जनाए। “त्यसको क्षेत्राधिकारमा केही वर्तमान र केही पूर्व पदाधिकारीलाई उन्मुक्ति दिइएकोबाट सरकार छनोटपूर्ण (सेलेक्टिभ) सुशासनको पक्षमा त छैन भन्ने आशंका जन्मिएको छ,” उनले टिप्पणी गरे। साथै, उनले आफू अर्थमन्त्री हुँदा नयाँ चरणको आर्थिक सुधारका कार्यक्रम अघि सारेको स्मरण गर्दै हालका अर्थमन्त्रीले त्यसलाई अघि बढाउन चाहेमा धन्यवाद दिए।