युरोभिजनबारे लाभरोभको टिप्पणी, इन्टरभिजन साउदी अरबमा गर्ने तयारी
मस्को । रूसी विदेशमन्त्री सर्गेई लाभरोभले रूस युरोभिजन गीत प्रतियोगितामा फर्किने सम्भावनाबारे टिप्पणी गर्दै रूसका लागि अहिलेका युरोभिजन मापदण्ड उपयुक्त नभएको बताएका छन्।
मस्कोमा मे १८ मा इक्वेटोरियल गिनीका विदेश, अन्तर्राष्ट्रिय सहकार्य तथा डायस्पोरा मन्त्री सिमेओन ओयोना एसोनो आङ्गुएसँगको संयुक्त पत्रकार सम्मेलनमा सञ्चारकर्मीले रूसको युरोभिजनमा सम्भावित पुनरागमन र आगामी इन्टरभिजन प्रतियोगिताको मितिबारे प्रश्न गरेका थिए।
जवाफमा लाभरोभले पछिल्लो समय युरोभिजनसँग सम्बन्धित संस्थाबाट रूसबारे कुनै टिप्पणी आफूले नसुनेको बताए। उनले युरोपेली संघमा जस्तै संगीत क्षेत्रका केही पक्षबाट पनि रूसलाई बोलाउने कि नबोलाउने भन्ने खालका टिप्पणी आएको उल्लेख गरे।
लाभरोभले अहिले युरोभिजनका सहभागीका लागि निर्धारण गरिएका मापदण्ड रूसले पूरा गर्न नसक्ने बताए। उनले ती मापदण्ड रूसको सांस्कृतिक दृष्टिकोण र परम्परागत मूल्यसँग मेल नखाने टिप्पणी गरे।
उनका अनुसार रूस अहिले ब्रिक्स, शाङ्घाई सहयोग संगठनलगायत बहुपक्षीय संरचनाभित्र सांस्कृतिक, मानवीय, शैक्षिक, संगीत र खेलकुद क्षेत्रमा सहकार्य विस्तारमा सहज रूपमा अघि बढिरहेको छ। यी संरचनामा राजनीतिक, सुरक्षा, व्यापार, आर्थिक र लगानीका विषयसँगै सांस्कृतिक सम्बन्धलाई पनि प्राथमिकता दिइएको उनले बताए।
लाभरोभले ब्रिक्सलगायत मञ्चमा परम्परागत मूल्य, सांस्कृतिक विविधता, संगीत तथा जनताका ऐतिहासिक कलात्मक परम्परालाई संरक्षण र समृद्ध बनाउने उद्देश्यका कार्यक्रम बढ्दै गएको उल्लेख गरे।
उनका अनुसार इन्टरभिजन प्रतियोगिता पनि यही अवधारणाबाट अघि आएको हो। यसको उद्देश्य ब्रिक्स देशहरूका परम्परागत कला र सांस्कृतिक अभिव्यक्तिलाई एक ठाउँमा ल्याउनु रहेको उनले बताए।
पहिलो इन्टरभिजन प्रतियोगिता गत सेप्टेम्बरमा मस्कोमा आयोजना भएको थियो। त्यसपछि साउदी अरबले सन् २०२६ मा अर्को प्रतियोगिता आयोजना गर्ने घोषणा गरेको लाभरोभले जानकारी दिए। तर प्रतियोगिताको मिति भने अझै तय भइनसकेको उनले बताए।
लाभरोभले फारस खाडी क्षेत्रमा अमेरिका र इजरायलका गतिविधिबाट उत्पन्न अवस्थाले यस वर्ष प्रतियोगिता आयोजना गर्ने योजनामा असर नपरोस् भन्ने आशा व्यक्त गरे।
