मितेरीको ५९ वर्ष: रुसी शिक्षाले गाँसेको नेपाल-रुस सम्बन्धको जीवित सेतु

काठमाडौं — सोभियत तथा रुसी विश्वविद्यालयबाट अध्ययन गरी नेपाल फर्किएका पूर्व विद्यार्थीहरूको अन्तर्राष्ट्रिय संस्था ‘मित्र कुञ्ज’ ले आफ्नो ५९औं स्थापना दिवस काठमाडौंस्थित रुसी भवनमा भव्य समारोहका साथ मनाएको छ। झन्डै छ दशकदेखि नेपाल र रुसबीचको मित्रताको जीवित प्रतीक बनेको यस संस्थाको कार्यक्रममा कूटनीतिज्ञ, पूर्वमन्त्री, प्राध्यापक, चिकित्सक, इन्जिनियर, साहित्यकार तथा विभिन्न पेसाका पूर्व विद्यार्थीहरूको उल्लेखनीय उपस्थिति रहेको थियो।

रुसी संघका नवनियुक्त राजदूत एलेक्सी भ्लादिमिरोभिच सुरोभत्सेभले कार्यक्रमको प्रारम्भ गर्दै सोभियत तथा रुसी शिक्षा प्राप्त स्नातकहरूले नेपालको चिकित्सा, ऊर्जा, इन्जिनियरिङ, शिक्षा र संस्कृतिको क्षेत्रमा पुर्याएको योगदानको सराहना गरे। साथै, उनले मित्र कुञ्जलाई मानवीय तथा व्यावसायिक आदानप्रदानको प्रमुख संवाहकको रूपमा चित्रण गरे।

कार्यक्रमको विशेष आकर्षणका रूपमा संस्थाको यात्रा, यसका सदस्य, पहल र उपलब्धिहरू समेटिएको स्मारिका संस्करणको विमोचन तथा प्रदर्शनीको उद्घाटन गरिएको थियो।

काठमाडौंस्थित रुसी भवनकी प्रमुख अनास्तासिया खोखलोभाले मित्र कुञ्जले बितेका वर्षहरूमा दुई देशबीचको स्थायी मित्रताको महत्त्वपूर्ण प्रतीकका रूपमा आफूलाई स्थापित गरेको बताइन्। “मित्र कुञ्ज नेपाल र रुसबीचको सुदृढ मित्रताको प्रतीक हो। सोभियत र रुसी शिक्षण संस्थाका स्नातकहरूको पुस्तालाई जोड्दै यसले हाम्रो द्विपक्षीय सम्बन्धको आधार रहेको सांस्कृतिक संवाद, शैक्षिक आदानप्रदान र जनस्तरको सम्बन्ध प्रवर्द्धनमा महत्त्वपूर्ण भूमिका खेलेको छ,” उनले भनिन्। खोखलोभाले संस्था पूर्व विद्यार्थी भेटघाटभन्दा माथि उठेर स्वास्थ्य सेवा, परोपकार र रक्तदान जस्ता सामाजिक गतिविधिमा समेत उत्तिकै सक्रिय रहेको र यसले समग्र नेपाली समाजको विकासमा उल्लेखनीय योगदान गरिरहेको पनि उल्लेख गरिन्।

संस्थाको नेतृत्व गर्ने पहिलो महिला अध्यक्ष सुष्मा खत्री रञ्जितले ५९औं वार्षिकोत्सव केवल मिति नभई संस्थाले परिपक्वताको कोसेढुङ्गा पार गर्दै नयाँ चरणमा प्रवेश गरेको सङ्केत भएको बताइन्। “मित्र कुञ्ज केवल पूर्व विद्यार्थी सङ्घ मात्र होइन। यो त विभिन्न पेसा र पुस्ताका सदस्यहरू साझा स्मृति, मूल्य-मान्यता र नेपालको विकासप्रतिको सेवा भावनाले एकाकार भएको सच्चा मित्रताको क्लब हो। आज यो संस्थाले सोभियत-रुसी शिक्षाको भावना जोगाउनुका साथै शिक्षा, संस्कृति, सार्वजनिक पहल र युवा सहयोगमार्फत हाम्रा जनताबीचको सेतुलाई थप सुदृढ गरिरहेको छ,” उनले भनिन्। उनले मित्र कुञ्जको केन्द्रीय कार्यालय काठमाडौंमा मात्र नभई देशका विभिन्न सहरहरूमा शाखा सञ्जाल विस्तार भइसकेको पनि जानकारी गराइन्।