क्यालिफोर्नियाको मस्जिदमा गोलीकाण्ड : पाँचको मृत्यु, घृणित अपराधको आशङ्कामा अनुसन्धान सुरु
क्यालिफोर्निया — दक्षिणी क्यालिफोर्नियास्थित सान डिएगोको इस्लामिक सेन्टर (आईसीएसडी) मा सोमबार भएको गोलीकाण्डमा परी कम्तीमा पाँच जनाको मृत्यु भएको प्रहरीले जनाएको छ। मृतकमध्ये तीन जना पीडित र दुई जना शङ्कास्पद आक्रमणकारी रहेका छन्।
सान डिएगो प्रहरी विभागले सामाजिक सञ्जाल एक्समा जारी गरेको विज्ञप्तिमा एक्ट्रोम एभिन्युको ७०५० ब्लकमा अवस्थित उक्त इस्लामिक सेन्टरमा सक्रिय आक्रमणकारी रहेको सूचना प्राप्त भएपछि प्रहरी अधिकारीहरू घटनास्थलमा परिचालित भएको उल्लेख गरेको छ। पछिको पोस्टमा उक्त खतरा ‘निस्तेज’ भएको विभागले जनाएको छ।
घटनास्थलमा रहेका प्रहरी अधिकारीहरूले पत्रकारहरूलाई बताएअनुसार, स्थानीय समय बिहान करिब ११ बजेर ४३ मिनेटमा उक्त सेन्टरमा सक्रिय आक्रमणकारी रहेको सूचना अधिकारीहरूले प्राप्त गरेका थिए। चार मिनेटभित्रै पुगेका प्रहरीले भवनबाहिर तीन जनालाई मृत अवस्थामा फेला पारे।
यसैबीच, सो सेन्टरबाट केही ब्लक टाढा थप गोली चलेको सूचना पनि प्रहरीले प्राप्त गरेको थियो। नजिकै काम गरिरहेका एक मालीमाथि पनि गोली प्रहार भएको तर उनी घाइते नभएको प्रहरीले जनाएको छ।
त्यसको केही समयपछि ह्याटन स्ट्रिटको ३८०० ब्लकमा सडकको बीचमा एक गाडी फेला परेको थियो, जसभित्र दुई युवक मृत अवस्थामा रहेको र तिनै दुई घटनामा संलग्न आक्रमणकारी भएको विश्वास प्रहरीले गरेको छ। सान डिएगोका प्रहरी प्रमुख स्कट वाहलका अनुसार ती दुई शङ्कास्पद आक्रमणकारी १७ र १८ वर्षका किशोर रहेको पहिचान भएको छ र उनीहरूले “आफैलाई गोली हानी आत्महत्या गरेको” देखिन्छ।
प्रहरीले आक्रमणको स्थानका कारण अर्को प्रमाण नभेटिएसम्म यस घटनालाई ‘घृणित अपराध’ को रूपमा हेरिरहेको जनाएको छ। जनताका लागि हाल कुनै निरन्तरको खतरा नरहेको प्रहरी विभागले जनाएको छ।
स्थानीय कानुन कार्यान्वयनकर्मीहरूले संघीय अनुसन्धान ब्यूरो (एफबीआई) सँग नजिकबाट सहकार्य गरिरहेका छन्। एफबीआईको सान डिएगो कार्यालयका एक अधिकारीले ‘विशेष एजेन्ट, टास्क फोर्स अधिकारी, प्रमाण सङ्कलन टोली, पीडित सहयोग विशेषज्ञ’ लगायतका कर्मचारीहरू घटनास्थलमा सहयोगका लागि परिचालित भएको जानकारी दिए।
गोलीकाण्डको उद्देश्यबारे अनुसन्धान जारी रहेको प्रहरीले जनाएको छ। सञ्चारमाध्यमहरूले कानुन कार्यान्वयन अधिकारीहरूलाई उद्धृत गर्दै दिएको विवरणअनुसार, एक आक्रमणकारीले आफ्नो अभिभावकको घरबाट हतियार लिएको र पछाडि जातीय गौरवसम्बन्धी लेखोट सहितको आत्महत्या पत्र छोडेको थियो भने हतियारमा पनि घृणित नारा लेखिएको थियो।
अमेरिकी राष्ट्रपति डोनाल्ड ट्रम्पले सान डिएगो गोलीकाण्डबारे आफूलाई प्रारम्भिक जानकारी दिइएको र आफ्नो प्रशासनले स्थितिमाथि अनुगमन जारी राख्ने पत्रकारहरूलाई बताए।
क्यालिफोर्नियाका गभर्नर गेभिन न्युसोमले एक्समा भनेका छन्, “क्यालिफोर्नियामा घृणाको कुनै स्थान छैन, र हामी आस्थामा आधारित समुदायविरुद्धको आतङ्क वा धम्कीको कार्य सहने छैनौं।”
आईसीएसडीको वेबसाइटका अनुसार, यो सान डिएगो काउन्टीकै सबैभन्दा ठूलो मस्जिद हो।
