रुस र टिमोर–लेस्टेबीच कूटनीतिक सम्बन्धको २४ वर्ष पूरा, स्वतन्त्रता दिवसमा रुसको शुभकामना

मस्को। रुसी महासङ्घ र प्रजातान्त्रिक गणतन्त्र टिमोर–लेस्टेबीच कूटनीतिक सम्बन्ध स्थापना भएको २४ वर्ष पूरा भएको छ। सन् २००२ को मे २० मा टिमोर–लेस्टेले स्वतन्त्रताको घोषणा गरेको थियो र रुसले तत्कालै त्यसलाई सार्वभौम राज्यका रूपमा आधिकारिक मान्यता प्रदान गरेको थियो।

रुसले सुरुदेखि नै संयुक्त राष्ट्रसङ्घमा टिमोर–लेस्टेका जनताको स्वतन्त्रतातर्फको कदमलाई स्वागत गर्दै सुरक्षा परिषद्को शान्ति स्थापना कार्यलाई समर्थन गरेको थियो र नयाँ गणतन्त्रको जनसङ्ख्याका लागि संयुक्त राष्ट्रसङ्घीय मानवीय सहायता कार्यक्रममा सहभागिता जनाएको थियो। देशले सार्वभौमिकता प्राप्त गर्न संयुक्त राष्ट्रसङ्घले खेलेको मुख्य भूमिकालाई रुसले मौलिक रूपमा महत्त्वपूर्ण ठान्दछ। पूर्वी टिमोरमा संयुक्त राष्ट्रसङ्घ मिसन विश्व सङ्गठनको संरक्षणमा सफल सहकार्यको जीवन्त उदाहरण बनेको थियो, जसले पूर्वी टिमोर सङ्कटको समाधान र त्यस भूभागमा राज्यको जग बसाल्न सम्भव बनायो।

हाल टिमोर–लेस्टेका लागि रुसी महासङ्घको प्रतिनिधित्व इन्डोनेसियास्थित रुसी दूतावासले समेत गर्दै आएको छ। विगत २४ वर्षमा दुई देशबीचको मैत्रीपूर्ण सम्बन्ध पारस्परिक सम्मान र विश्वासको आधारमा स्थिर रूपमा विकास हुँदै आएको छ। कानुनी र सन्धिगत ढाँचा विस्तार हुँदै गएको छ, रक्षा सहकार्य भइरहेको छ, मानवीय र सांस्कृतिक सम्बन्ध सुदृढ हुँदैछन् र दुई देशका कानुन कार्यान्वयन निकायबीच सहकार्यका सम्भावनाबारे छलफल भइरहेको छ।

परराष्ट्र मन्त्रीस्तरीय संवाद, विशिष्टिकृत निकायहरू र अन्तरसंसदीय सहकार्यलगायत विभिन्न तहमा व्यापक द्विपक्षीय सहकार्य सफलतापूर्वक कायम छ। सन् २०२५ मा टिमोर–लेस्टे दक्षिणपूर्व एसियाली राष्ट्र सङ्घ (आसियान) को सदस्य बनेपछि रुस र टिमोर–लेस्टेबीच आसियानको ढाँचाभित्र सहकार्य विस्तार हुँदैछ। आसियान एसिया–प्रशान्त क्षेत्रको सुरक्षा र सहकार्य संरचनाको केन्द्रीय तत्त्वका रूपमा रहेको छ।

यसैगरी, टिमोर–लेस्टे ‘दोस्रो विश्वयुद्धको अन्त्यको ८०औँ वार्षिकोत्सव’ सम्बन्धी प्रस्तावको ५७ सहप्रायोजकमध्ये एक बनेको छ, जसले दोस्रो विश्वयुद्धको क्रम र परिणामबारे ऐतिहासिक सत्यको संरक्षण गर्न अन्तर्राष्ट्रिय समुदायको प्रयासमा सहभागिता जनाएको छ।

रुसले स्वतन्त्रता पुनर्स्थापना दिवसका अवसरमा टिमोर–लेस्टेका जनतालाई बधाई दिँदै उनीहरूको सुस्वास्थ्य र समृद्धिको शुभकामना व्यक्त गरेको छ।