रुस–चीन सहकार्य विस्तारमा नयाँ सहमति
बेइजिङ । रुसी राष्ट्रपति भ्लादिमिर पुटिन र चीनको राज्य परिषद्का प्रधानमन्त्री ली छ्याङबीच मे २०, २०२६ मा बेइजिङमा भेटवार्ता भएको छ। भेटमा दुवै पक्षले रुस–चीन सम्बन्धलाई थप व्यावहारिक, स्थिर र दीर्घकालीन सहकार्यको दिशामा अघि बढाउने विषयमा छलफल गरेका छन्। चिनियाँ सरकारी समाचार संस्था सिन्ह्वाका अनुसार प्रधानमन्त्री लीले बदलिँदो र जटिल अन्तर्राष्ट्रिय परिस्थितिबीच चीन–रुस सम्बन्ध स्थिर र पूर्वानुमानयोग्य रहेको बताएका छन्।
भेटवार्ताका क्रममा राष्ट्रपति पुटिनले चिनियाँ राष्ट्रपति सी चिनफिङसँग भएको वार्ता अत्यन्त फलदायी र उपयोगी रहेको बताए। उनले दुई राष्ट्रप्रमुखबीच महत्वपूर्ण संयुक्त वक्तव्यसहित विभिन्न दस्तावेजमा हस्ताक्षर भएको जानकारी दिँदै ती दस्तावेजहरूले प्रमुख क्षेत्रहरूमा दुवै देशका साझा दृष्टिकोण र कार्यदिशा स्पष्ट गरेको उल्लेख गरे।
पुटिनका अनुसार राष्ट्रपति सीसँगको वार्तापछि रुस–चीन सहकार्यलाई गुणात्मक रूपमा नयाँ चरणमा पुर्याउने महत्वाकांक्षी लक्ष्य तय गरिएको छ। उनले दुई देशका सरकारहरूको विशेष जिम्मेवारी रहेको बताउँदै व्यावहारिक क्षेत्रमा सहकार्य कार्यान्वयन गर्ने मुख्य दायित्व सरकारकै हुने धारणा व्यक्त गरे।
रुस–चीन आर्थिक सहकार्यबारे पुटिनले सन् २०२५ को अन्त्यतिर द्विपक्षीय व्यापार सूचकहरूमा केही समायोजन देखिए पनि चालु वर्ष व्यापार कारोबारमा १० प्रतिशतभन्दा बढी वृद्धि भइरहेको बताए। उनले स्वीकृत दीर्घकालीन रणनीति, विशेषगरी सन् २०३० सम्मको रुस–चीन आर्थिक सहकार्य योजनाअनुसार व्यापार सहकार्यलाई निरन्तर अघि बढाइने उल्लेख गरे। सिन्ह्वाले पनि भेटमा व्यापार, ऊर्जा, कृषि, यातायात तथा रसद, उद्योग, डिजिटल अर्थतन्त्र, कृत्रिम बौद्धिकता र विज्ञान–प्रविधि नवप्रवर्तनका क्षेत्रमा सहकार्य अघि बढाउने विषय उठेको जनाएको छ।
पुटिनले रुस–चीन सहकार्यलाई नकारात्मक बाह्य प्रभावबाट सुरक्षित राख्नु दुवै देशको प्राथमिकता रहेको बताए। उनका अनुसार द्विपक्षीय व्यापारमा राष्ट्रिय मुद्राको लगभग पूर्ण प्रयोग यसका लागि महत्वपूर्ण आधार बनेको छ। उनले ऊर्जा, उद्योग, अन्तरिक्ष, कृषि, यातायात तथा रसद क्षेत्रमा संयुक्त परियोजनाहरू अघि बढाउने विषय एजेन्डामा रहेको जानकारी दिए।
डिजिटल नवप्रवर्तन र कृत्रिम बौद्धिकता प्रविधिले दुवै देशको आर्थिक विकासका लागि नयाँ अवसर खोलिरहेको पुटिनको भनाइ थियो। उनले संस्कृति, चलचित्र, खेलकुद, युवा आदानप्रदान र पर्यटनजस्ता मानवीय सम्पर्कका क्षेत्रहरू पनि सक्रिय रूपमा विकसित भइरहेको बताए।
दुई देशबीच पारस्परिक आधारमा भिसामुक्त व्यवस्था लागू गर्ने निर्णयले पर्यटन तथा विभिन्न व्यावहारिक क्षेत्रमा संलग्न व्यक्तिहरूलाई सहज बनाएको पुटिनले उल्लेख गरे। उनले राष्ट्रपति सीसँग मिलेर रुस–चीन शिक्षा वर्षको औपचारिक शुभारम्भ गरिएको जानकारी दिँदै यो अन्तरराज्यीय परियोजनाले उन्नत उद्योगसहित विभिन्न क्षेत्रमा जनशक्ति प्रशिक्षणलाई नयाँ स्तरमा पुर्याउने विश्वास व्यक्त गरे।
यसअघि राष्ट्रपति सी चिनफिङ र राष्ट्रपति पुटिनबीच बेइजिङस्थित ग्रेट हल अफ द पिपुलमा वार्ता भएको थियो। चिनियाँ विदेश मन्त्रालयका अनुसार दुई राष्ट्रप्रमुखले चीन–रुस असल छिमेकीपन तथा मैत्रीपूर्ण सहकार्य सन्धिलाई थप विस्तार गर्ने सहमति गरेका छन्।
भेटका क्रममा दुवै पक्षले बेल्ट एन्ड रोड सहकार्य र युरेसियाली आर्थिक संघबीच समन्वय सुदृढ गर्ने, चीन–युरोप रेल सेवा सुरक्षित र गुणस्तरीय रूपमा अघि बढाउने तथा युवा, संस्कृति, पर्यटन र खेलकुद क्षेत्रमा आदानप्रदान बढाउने विषयमा पनि जोड दिएका छन्।
