‘ककरोच जनता पार्टी’को सडक शक्ति प्रदर्शनलाई बेंगलुरु प्रहरीले लगायाे रोक, टाउन हलमा भेला नहुन चेतावनी

बेंगलुरु — बेंगलुरु प्रहरीले शुक्रबार सहरको टाउन हल नजिकै ‘शान्तिपूर्ण मानव साङ्लो’ प्रदर्शनका लागि भेला नहुन चेतावनी दिएको छ। सामाजिक सञ्जालमा ‘ककरोच जनता पार्टी कर्नाटक’ नामक एक व्यंग्यात्मक अनलाइन समूहले यस्तो प्रदर्शनको निम्तो दिने पोस्टर फैलाएपछि प्रहरीले उक्त कदम चालेको हो।

पोस्टरमा समूहले आइतबार टाउन हलमा भेला हुन आह्वान गर्दै लेखेको थियो, “सबै ककरोच (साङ्ला) हरू र ककरोच जनता पार्टीका समर्थकहरू, आफ्नो शक्ति प्रदर्शन गर्न र भ्रममा रहेको प्रशासनलाई सन्देश दिन हामीसँग जोडिनुहोस्।” यसमा “अब केवल अनलाइन होइन, सडकमा शक्ति देखाउने समय आएको छ” भन्ने नारा पनि समावेश थियो।

यो जानकारी बाहिरिएलगत्तै बेंगलुरु सहर प्रहरीले विज्ञप्ति जारी गर्दै उक्त प्रदर्शनका लागि कसैले पनि अनुमति नलिएको र ग्रेटर बेंगलुरु प्राधिकरणसँग पनि अनुमति नमागिएको स्पष्ट पारेको छ। प्रहरीका अनुसार, उच्च अदालतको आदेशबमोजिम प्रदर्शनहरू केवल ‘फ्रीडम पार्क’ मा मात्र गर्न पाइने भएकाले सडकमा यस्तो प्रदर्शन गर्न निषेध गरिएको छ।

बेंगलुरु प्रहरीले भनेको छ, “सर्वसाधारणलाई फेसबुक, ह्वाट्सएप, इन्स्टाग्राम र एक्स (ट्विटर) जस्ता सामाजिक सञ्जालहरूमा उक्त सन्देश नफैलाउन वा सेयर नगर्न तथा टाउन हल नजिक भेला नहुन सल्लाह दिइन्छ।” पोस्टरमा साङ्लाहरूले “नम्मा हक्कु” (हाम्रो अधिकार) लेखिएको प्लेकार्ड बोकेर विधान सौधातर्फ हिँडिरहेको तस्बिर प्रयोग गरिएको थियो। त्यसमा लेखिएको छ, “आउनुहोस् साङ्लाहरू, एउटा सन्देश पठाऔं। यहाँ कुनै नेता छैनन्; हामी आफैं हाम्रा नेता हौं। यहाँ कुनै संगठन छैन; नागरिकहरू एक हुनु नै आफैंमा एक संगठन हो।”

उल्लेखनीय छ, ‘ककरोच जनता पार्टी’ आम आदमी पार्टीका पूर्व राजनीतिक रणनीतिकार अभिजित दिपकेद्वारा १६ मे मा सुरु गरिएको एक व्यंग्यात्मक राजनीतिक आन्दोलन हो। यो मञ्च भारतका प्रधानन्यायाधीश सूर्यकान्तले युवा बेरोजगार भारतीयहरूलाई “साङ्ला” भनेको भनी आएको टिप्पणीको प्रतिक्रियास्वरूप सुरु गरिएको थियो। यद्यपि, पछि प्रधानन्यायाधीशले सञ्चारमाध्यमले आफूलाई “गलत उद्धृत” गरेको भन्दै स्पष्टीकरण दिएका थिए।