लाभरोभको टिप्पणी : विश्व युद्धकै सङ्घारमा छौं, विशेष सैन्य कारबाहीको सफलता नै रुसको प्रमुख प्राथमिकता

मस्को — रुसी विदेशमन्त्री सर्गेई लाभरोभले विश्वले अहिले अनुभव गरिरहेको द्वन्द्व र अस्थिरताको अवस्था नयाँ किसिमको विश्व युद्धको सङ्केत हुन सक्ने बताएका छन्। मस्कोमा शुक्रबार आयोजित विदेश तथा रक्षा नीति परिषद्को ३४औं महासभालाई सम्बोधन गर्दै उनले यस्तो धारणा राखेका हुन्।

लाभरोभले भने, ‘के हामीले आज अनुभव गरिरहेको अवस्था नयाँ विश्व युद्ध हो भन्ने प्रश्न सार्वजनिक बहसमा बढ्दो रूपमा उठिरहेको छ। कोही यो विश्व युद्ध नै हो भन्ने पक्षमा तर्क राख्छन् भने सैन्य कारबाहीको प्रकृतिमा आएको गुणात्मक परिवर्तनका आधारमा यसलाई मौलिक रूपमा नयाँ किसिमको युद्ध मान्नुपर्ने दाबी पनि गरिन्छ।’ उनले यो अवस्था युरेसियामा पूर्ण रूपमा सक्रिय रहेको बताए।

रुसी विदेशमन्त्रीले भने, ‘पश्चिमाले युक्रेनमा रुसविरुद्ध आक्रामकता मञ्चन गर्यो, जुन हाम्रो देशलाई कमजोर बनाउने र प्रमुख विश्व शक्तिका रूपमा स्थान सुनिश्चित नहोस् भन्ने अर्को प्रयास थियो। त्यसपछि उनीहरूले पर्सियन खाडी र होर्मुज स्ट्रेटमा कारबाही सुरु गरे। एसियाली महादेशको दक्षिणी र पूर्वी भागमा सीमा झडपहरू भए।’ उनले ल्याटिन अमेरिकाका अनेकौं समस्यालाई पनि सङ्केत गरे। यी सबै तत्त्व र द्वन्द्वहरूलाई तिनको तीव्रताका आधारमा जोडेर हेर्दा विश्व युद्धको संज्ञा दिन सकिने कि नसकिने भन्ने निष्कर्ष भविष्यका इतिहासकारहरूले निकाल्ने उनको भनाइ थियो।

लाभरोभले पश्चिमाले रुसका सहयोगीहरूलाई खोस्ने प्रयास गरिरहेको बताए। उनले भने, ‘यो मुख्यतः हाम्रा छिमेकीहरूसँग सम्बन्धित छ, जुन जर्जिया र मोल्दोभाको मामलामा भयो र अहिले युक्रेनसँग भइरहेको छ। उनीहरूले आर्मेनियालाई पनि त्यही गलत बाटोमा राख्न खोजिरहेका छन्। उनीहरूको एकमात्र लक्ष्य रुसलाई सकेसम्म धेरै चोट पुर्याउनु हो।’

रुसी विदेशमन्त्रीले अफ्रिकामा पनि रुसले धेरै काम गरिरहेको र दूतावासहरू पुनर्स्थापित गरिरहेको बताए। तर, उनले रुसको कूटनीतिको प्राथमिक कार्य विशेष सैन्य कारबाहीलाई प्रभावकारी, विजयी र मूर्त परिणाम दिने बनाउन आवश्यक वातावरण सिर्जना गर्नु रहेकोमा जोड दिए। उनले भने, ‘हाम्रा मित्र, छिमेकी र हाम्रा विरोधी तथा शत्रुहरू सबैले यो कसरी अघि बढ्छ भनेर नजिकबाट हेरिरहेका छन्। त्यसैले हाम्रो कूटनीतिको प्राथमिक कार्य विशेष सैन्य कारबाही सफल बनाउन सबै आवश्यक वातावरण सिर्जना गर्नु हो।’