रास्वपा सभापति लामिछाने जुन १ मा भारत भ्रमणमा जाने, मोदीसँग भेटवार्ताको सम्भावना
काठमाडौं — राष्ट्रिय स्वतन्त्र पार्टी (रास्वपा) का सभापति रवि लामिछाने भारत भ्रमणमा जाने भएका छन्। भारतीय विदेश मन्त्रालयको निमन्त्रणामा उनी दुईदिने औपचारिक भ्रमणका लागि जुन १ मा नयाँदिल्ली प्रस्थान गर्ने कार्यक्रम तय भएको छ। यद्यपि, दुवै पक्षले भ्रमणको औपचारिक घोषणा गरिसकेका छैनन्।
प्रधानमन्त्री बालेन्द्र शाह नेतृत्वको सरकार गठन भएपछि सत्तारूढ गठबन्धनबाट भारत भ्रमण गर्ने उनी पहिलो वरिष्ठ नेता हुनेछन्। भ्रमण टोलीमा लामिछानेकी पत्नी निकिता पौडेल, स्वकीय सचिव तथा रास्वपाका दुई सांसद विपिनकुमार आचार्य र दीपक बोहरा सहभागी हुनेछन्।
मोदीसहित उच्चस्तरीय भेटवार्ताको तयारी
भ्रमणका क्रममा लामिछानेले भारतीय प्रधानमन्त्री नरेन्द्र मोदी, विदेशमन्त्री एस. जयशंकर, राष्ट्रिय सुरक्षा सल्लाहकार अजित डोभाल, सडक यातायात तथा राजमार्गमन्त्री नितिन गडकरी, विदेश सचिव विक्रम मिस्री तथा भाजपा अध्यक्ष नितिन नवीनलगायत उच्चपदस्थ अधिकारीहरूसँग भेटवार्ता गर्ने कार्यक्रम रहेको स्रोतले जनाएको छ। लामिछाने र मोदीबीच जुन २ मा भेटवार्ता प्रस्तावित भएको नयाँदिल्ली स्रोतले जनाएको छ।
पृष्ठभूमि: नेपाल–भारत सम्बन्धमा तनाव
यो भ्रमण नेपाल र भारतबीच केही तनाव उत्पन्न भएको सन्दर्भमा हुन लागेको हो। लिपुलेक सीमा विवाद, भारतबाट आयात हुने १०० रुपैयाँभन्दा बढी मूल्यका सामानमा भन्सार महसुल लगाइएको विषयमा भारतले अप्रत्यक्ष चासो व्यक्त गरेको थियो। यसै सन्दर्भमा भारतीय विदेश सचिव मिस्रीको गत मे ११ को काठमाडौं भ्रमण पनि स्थगित भएको थियो।
यद्यपि, नयाँदिल्ली स्रोतले लामिछानेको भ्रमणलाई द्विपक्षीय सम्बन्धका पछिल्ला तनावसँग जोड्न नहुने बताएको छ। “नयाँ नेपाली नेतृत्वसँग उच्चस्तरीय सम्पर्क कायम राख्न यो भ्रमण योजना गरिएको हो,” स्रोतले भन्यो।
प्रधानमन्त्रीको भ्रमणसँग नजोड्न सरकारको आग्रह
यसैबीच, सरकारका प्रवक्ता एवं शिक्षामन्त्री सस्मित पोखरेलले लामिछानेको भ्रमणलाई प्रधानमन्त्रीको भ्रमणसँग जोड्न नहुने बताएका छन्। “उहाँ व्यक्तिगत हैसियतमा जाँदै हुनुहुन्छ, यसलाई सरकारी भ्रमणसँग जोड्नु गलत हुन्छ। प्रधानमन्त्रीको भ्रमणसँग यसको कुनै सम्बन्ध छैन,” पोखरेलले भने।
प्रधानमन्त्री शाहले सत्ता सम्हालेपछि अहिलेसम्म कुनै पनि विदेश भ्रमण गरेका छैनन्। “प्रधानमन्त्रीले सही समय आएपछि भारत भ्रमण गर्नुहुनेछ। अहिले उहाँको ध्यान पूर्ण रूपमा देशभित्रकै काममा केन्द्रित छ,” पोखरेलको भनाइ थियो।
दिल्ली विश्वविद्यालयका सहप्राध्यापक निहार नायकका अनुसार लामिछानेको भ्रमणले नेपाल–भारत सम्बन्धलाई सरकार र पार्टी दुवै तहमा बलियो बनाउनेछ। “प्रधानमन्त्री आन्तरिक मामिलामा व्यस्त भएको र अहिले विदेश भ्रमणको योजना नभएको अवस्थामा पार्टी-देखि-पार्टी भ्रमण निकै अर्थपूर्ण हुन सक्छ,” उनले भने।
भ्रमणका क्रममा लामिछानेले अयोध्याको पनि भ्रमण गर्ने कार्यक्रम तय भएको स्रोतले जनाएको छ।
