जाम्मेमा चौथो ग्रामीण खेलकुद प्रतियोगिता सुरु
सिचुआन । चीनको सिचुआन प्रान्तअन्तर्गत जोइगे काउन्टीको जाम्मे टाउनमा चौथो ग्रामीण खेलकुद प्रतियोगिता उत्साहपूर्ण रूपमा सुरु भएको छ। ग्रामीण क्षेत्रका बासिन्दाको सांस्कृतिक तथा खेलकुद जीवनलाई समृद्ध बनाउने र सर्वसाधारणमा शारीरिक अभ्यासको भावना प्रवर्द्धन गर्ने उद्देश्यसहित प्रतियोगिता आयोजना गरिएको हो।
जाम्मे टाउन ग्रामीण खेलकुद संघको आयोजनामा सुरु भएको प्रतियोगितामा टाउनअन्तर्गतका विभिन्न गाउँबाट आएका किसान तथा पशुपालक समुदायका खेलाडीहरू सहभागी छन्। विशाल घाँसे मैदानमा भेला भएका खेलाडीहरूले विभिन्न खेलमार्फत आफ्नो क्षमता, उत्साह र सामूहिक भावना प्रदर्शन गरेका छन्।
उद्घाटन समारोहमा विभिन्न गाउँका प्रतिनिधि टोलीहरू अनुशासित र व्यवस्थित रूपमा सहभागी भएका थिए। कार्यक्रममा घाँसे मैदानका युवा–युवतीको सक्रियता, एकता र प्रतिस्पर्धात्मक भावना स्पष्ट रूपमा देखिएको आयोजकले जनाएको छ।
प्रतियोगितामा स्थानीय समुदायको आवश्यकता र रुचिलाई ध्यानमा राख्दै रिले दौड, बाल दौड, महिलाको ढुङ्गा उचाल्ने खेल, छोटो दूरीको दौड, मध्यम दूरीको दौड र लामो दूरीको दौडलगायतका विभिन्न खेल समावेश गरिएको छ। सबै उमेर समूहका सहभागीलाई समेट्ने गरी कार्यक्रम तय गरिएकाले प्रतियोगितामा स्थानीय बासिन्दाको उल्लेख्य सहभागिता रहेको छ।
प्रतियोगितास्थलमा खेलाडीहरूले उत्कृष्ट प्रदर्शनका लागि पूर्ण प्रयास गरेका थिए भने दर्शकहरूले हौसला बढाउँदै मैदानलाई उल्लासमय बनाएका थिए। हरियो घाँसे मैदानमा भएको प्रतिस्पर्धाले खेलाडीबीच चुनौती सामना गर्ने, आत्मविश्वास बढाउने र सामूहिक भावना बलियो बनाउने अवसर प्रदान गरेको आयोजकको भनाइ छ।
प्रतियोगिताले जाम्मे टाउनका विभिन्न समुदायबीच एकता, परिश्रम, सहयोग र सकारात्मक प्रतिस्पर्धाको भावना प्रवर्द्धन गरेको छ। खेलकुदमार्फत ग्रामीण समुदायबीच आपसी सम्बन्ध विस्तार गर्ने, स्थानीय प्रतिभालाई उजागर गर्ने र ग्रामीण पुनरुत्थानका लागि ऊर्जा थप्ने उद्देश्य प्रतियोगिताले बोकेको छ।
आयोजकका अनुसार यस प्रकारका खेलकुद गतिविधिले स्थानीय जनताको शारीरिक स्वास्थ्यसँगै मानसिक तथा सांस्कृतिक जीवनलाई पनि समृद्ध बनाउँछ। प्रतियोगिताले आधारभूत तहमा सभ्य, सक्रिय र स्वस्थ सामाजिक वातावरण निर्माण गर्न सहयोग पुर्याउने अपेक्षा गरिएको छ।
जाम्मे टाउनले आगामी दिनमा पनि सांस्कृतिक तथा खेलकुद गतिविधिलाई निरन्तरता दिँदै स्थानीय समुदायको आवश्यकता सम्बोधन गर्ने जनाएको छ। सर्वसाधारणको शारीरिक अभ्यासलाई प्रवर्द्धन गर्दै ग्रामीण विकास र टाउनको समग्र गुणस्तरीय विकासमा योगदान पुर्याउने लक्ष्य राखिएको छ।
